Inson tanasining asosiy qismi suvdan iborat bo‘lsa-da, ortiqcha suyuqlik to‘planib qolishi turli kasalliklarga olib keladi. Odatda, organizmdagi suv nafas olish, teri va siydik bilan tanadan chiqib ketadi, biroq ba’zi hollarda suyuqlik hujayra to‘qimalarida ham qolib ketishi mumkin. Ortiqcha suv to‘planishining belgilariga:
- to‘satdan vazn ortishi;
- oyoq va yuz sohasining shishishi;
- qorin hajmining kattarishi;
- nafas olishda qiynalish kabilar kiradi.
Tanada ortiqcha suyuqlik to‘planish sabablari
Hayz davrida gormonal o‘zgarishlar. Organizmdagi progesteron va estrogen darajasidagi o‘zgarishlar suyuqlik qolib ketishiga sabab bo‘lishi mumkin. Bu odatda oyda bir marta, hayz ko‘rishdan avval sodir bo‘ladi va salomatlikka xavf solmaydi.
Dori-darmonlarni qabul qilish. Qandli diabetga qarshi dorilar, qon bosimini tushiruvchi preparatlar, ibuprofen kabi og‘riq qoldiruvchilar hamda estrogenlardan shish paydo bo‘lishi mumkin.
Sayohat. Inson uzoq vaqt o‘tirganda oyoqlari shishib ketadi. Bu ham sog‘liq uchun xavfli emas va davolanishsiz o‘zi o‘tib ketadi. Istisno qilib samolyot parvozidan keyingi shishni aytish mumkin. U bir necha soat yoki kun davomida saqlanib qoladi va oyoqlarda og‘riq kuzatiladi. Bunday alomatlar chuqur tomir trombozidan darak berishi mumkin.
Homiladorlik. Homilador ayollar tanasida ko‘pincha suyuqlik to‘planib qoladi. Ularning oyoqlari, qo‘llari va yuzlari shishadi, boshqa jiddiy alomatlar bo‘lmasa, bunday shish normal hisoblanadi.
Ko‘p tuz iste’mol qilish. Osh tuzi 40 foiz natriydan iborat bo‘lib, organizmdagi hujayradan tashqari suyuqlik hajmini saqlaydigan mineraldir. Shuning uchun ortiqcha tuz ham shish keltirib chiqaradi.
Uzoq muddatli tik holatda qolish. Agar inson uzoq vaqt turib qolishi yoki ko‘p yurishi kerak bo‘lsa, suyuqlik oyoqlarda to‘planib, shish paydo bo‘ladi.
Qachon shifokorga murojaat qilish kerak?
Agar shishishdan tashqari, nafas qisilishi, yurak ritmining buzilishi va ko‘krak qafasida og‘riqlar paydo bo‘lsa, zudlik bilan tez yordam chaqiring. Bu o‘pkada suyuqlik to‘planishining belgisi bo‘lishi mumkin.
Tanadagi ortiqcha suyuqlikni bartaraf etish yo‘llari
Agar sizda shishlar kamdan-kam hollarda yuzaga kelsa va ma’lum vaqtdan so‘ng o‘zi o‘tib ketsa, uning oldini olish va asoratlarini kamaytirish mumkin. Buning uchun:
- tuz iste’molini kamaytiring;
- fast-fud va tuzli gazaklar yemang;
- ko‘proq sabzavot va mevalar iste’mol qiling;
- jismonan faol bo‘ling;
- ma’lum vaqt oyoqlarni ko‘targan holatda yoting;
- oyoq va qo‘llar uchun maxsus kompression qo‘lqop yoki bog‘lamdan foydalaning;
- shish bor zonani uqalang.
Izoh (0)