O‘zbekistonda yosh bolalar o‘rtasida semirib ketish holati ko‘paymoqda. Bu haqda 23-iyul kuni Sog‘liqni saqlash vazirligi vakillari jurnalistlar bilan bo‘lib o‘tgan ochiq muloqotda aytib o‘tildi, deya xabar bermoqda “Daryo” muxbiri Musulmonbek Ibrohimov.
Anjumanda Sog‘liqni saqlash vazirligi huzuridagi Tibbiy-ijtimoiy xizmatlar agentligi direktori Alisher Inoqov “Erta yoshdagi bolalar va go‘daklarni ovqatlantirish to‘g‘risida”gi qonun loyihasi haqida izoh berdi.
“So‘nggi vaqtlarda yosh bolalar o‘rtasida semirib ketish ko‘p kuzatilmoqda. Biz bolani iligi to‘q bo‘lishi uchun ko‘p ovqat yeyishi kerak, deymiz. Ba’zi bir xonadonlarda dasturxon kun bo‘yi yig‘ishtirilmaydi, bola aylanib kelib yana ovqatlanaveradi. Me’yorga qarab ovqatlanish yoddan ko‘tarildi. Statistika shuni ko‘rsatmoqdaki, yosh bolalar o‘rtasida vazn ortib ketishi ko‘paymoqda. Bu diabet, yurak yetishmovchiligiga olib keladi. Natijada, sog‘lom avlodni tarbiyalay olmay qolamiz. Shuning uchun ham, mana shu qonun loyihasining asosiy vazifalaridan biri shuki, to‘g‘ri ovqatlantirish orqali bolalarni normal holatda voyaga yetkazish”, — dedi Alisher Inoqov.
Vazirlik vakilining qo‘shimcha qilishicha, qonun loyihasida bolalar oshxonalari uchun alohida tartib kiritilmoqda.
“Bolalarga ko‘proq fast-fud ovqatlarni yedirib, gazlangan ichimliklarni ichiramiz. Aniqlandiki, fast-fud bolalar salomatligi uchun zarar ekan. Shuning uchun, ushbu qonunda bolalar oshxonalarida qanaqa ovqatlar bo‘lishi, qanday tartibda ovqat berilishi, qanday me’yorlar bo‘lishi kerakligi kabi masalalarga alohida e’tibor berilmoqda. Bong urib ushbu qonunni qabul qilmaydigan bo‘lsak, vaqtni boy berib qo‘ygan bo‘lamiz”, — deya qo‘shimcha qildi u.
Bolalarning ovqatlanishi avval qanday tartibga solingan va ushbu qonun loyihasida qanday o‘zgarishlar nazarda tutilayotgani haqidagi savolga mutasaddilar javob bermadi.
Shuningdek, Axborot va ommaviy kommunikatsiyalar agentligi bergan e’longa ko‘ra, anjumanda Sog‘liqni saqlash vaziri o‘rinbosari Bahodir Nizomov ishtirok etishi kerak edi, lekin vazirlik rahbariyati ishtirok etmadi va bunga ham mutasaddilar tomonidan hech qanday izoh berilmadi. Shundanmi, jurnalistlar tomonidan yo‘llangan ko‘plab savollar ochiq qoldi.
Izoh (0)