Бир неча кунлик ёғли овқатланишдан сўнг ичак яллиғланишдан ҳимояланиш қобилиятини йўқотади. Immunity журналида эълон қилинган тадқиқот натижаларига кўра, фаст-фудга хос бўлган тўйинган ёғларга бой парҳез ичакнинг тўсиқ вазифасини бузади ва тўқималар тикланиши ҳамда шиллиқ қаватни ҳимоя қилиш учун жавобгар бўлган IL-22 оқсили ишлаб чиқарилишини пасайтиради.
Австралиялик олимлар сичқонларни бор-йўғи бир ҳафта давомида ёғли озуқа билан боқишган. Натижада ичак ҳимоя вазифаларининг заифлашиши, деворларнинг қалинлашуви ва иммунитет ҳужайраларининг тўпланиши кузатилган — бу яширин яллиғланиш белгиларидир. Икки кундан сўнг ҳайвонлар ташқи кўринишдан соғлом бўлишига қарамай, организмда IL-22 миқдорининг пасайиши бошланган.
“Ёғли таомлар келтириб чиқарадиган яллиғланишнинг ўзига хос хусусияти шундаки, у дастлаб ўзини сездирмайди, аммо вақт ўтиши билан сурункали тусга кириши мумкин”, дейди тадқиқот муаллифлари.
Тадқиқотчиларнинг таъкидлашича, фаст-фуддан воз кечиш ичак ҳимоясини тиклашга ёрдам беради, айниқса агар тўйинган ёғлар ёнғоқ ва авокадодаги каби тўйинмаган ёғлар билан алмаштирилса.
Апрель ойида испан олимлари ёғли овқат саратон касаллигининг тарқалишини тезлаштириши мумкинлигини исботлашди. Маълум бўлишича, ёғларни меъёридан ортиқ истеъмол қилиш тромбоцитлар фаолиятини кучайтиради ва фибронектин оқсили миқдорини оширади. Бу эса ўсимта метастазланиши учун қулай шароит яратади, айниқса ўпкада.
Изоҳ (0)