“Manchester Yunayted” rahbariyati yozgi transfer oynasi paytida jamoani kuchaytirishni rejalashtirmoqda. Bu haqda Givemesport nashri xabar bermoqda.
Manbaga ko‘ra, “qizil iblislar” Yevropa Ligasida g‘alaba qozonishni uddalasa, yangi futbolchilarni xarid qilish uchun kamida 200 million funt sterling (salkam 250 million yevro) sarflaydi. Ingliz klubi ushbu turnirda g‘olib bo‘lishni uddalasa, keyingi mavsum Chempionlar Ligasida qatnashish imkoniyatini qo‘lga kiritadi. Agarda, mankunianliklar Yevropa Ligasida imkoniyatni boy bersa, u holda klub katta transferlarni amalga oshirmaydi.
Ruben Amorim shogirdlari Yevropa ligasi finalida Londonning “Tottenhem” jamoasi bilan kuch sinashadi. Ushbu bahs 21-may, chorshanba kuni Bilbaodagi “San Mames” stadionida bo‘lib o‘tadi.
Ma’lumot uchun, ayni paytda “Manchester Yunayted” Angliya Premyer Ligasi turnir jadvalida 39 ochko bilan 16-pog‘onani egallab turibdi. “Qizil iblislar” navbatdagi turda “Chelsi”ga qarshi maydonga tushadi. Bahs 16-may, juma oqshomida bo‘lib o‘tadi.
Izoh (0)