“Chelsi” yozgi transfer bozorida katta xaridlarni amalga oshirishni rejalashtirmoqda. London klubi “Real Madrid”ning ikki iqtidorli hujumchisi — Rodrigo Goes va Endrikni o‘z safiga qo‘shib olish uchun harakat qilib ko‘radi. Bu haqida Todofichajes nashri xabar berdi.
Ma’lumotlarga ko‘ra, “ko‘klar” ikki braziliyalik futbolchi uchun 180 million yevro (Rodrigo uchun 120 million, Endrik uchun 60 million) to‘lashga tayyor. Klub rahbariyatining fikricha, ushbu transferlar nafaqat “Chelsi”ning hujum chizig‘ini kuchaytirish, balki Angliya Premyer Ligasi hamda Yevropa miqyosida yana raqobatbardosh jamoaga aylanishga xizmat qiladi.
Rodrigo Karlo Anchelotti tizimida asosiy futbolchilardan biri hisoblanadi. U joriy mavsum Chempionlar Ligasida 10 o‘yinda maydonga tushib, 5 gol va 2 assist muallifiga aylandi. “Chelsi” uning La Liga va Chempionlar Ligasidagi tajribasidan foydalanib, ko‘plab sovrin yutishni maqsad qilgan.
Endrik 2024-yilda “Palmeyras”dan “Real” safiga qo‘shildi va hali jamoaga to‘liq moslashib ulgurmagan. Lekin u katta salohiyatga ega futbolchi ekanligi londonliklarning “short listi”dan joy olishga sabab bo‘lmoqda.
Biroq “Real” bu transferlar bo‘yicha muzokara o‘tkazishni istamayapti. Klub prezidenti Florentino Peres Rodrigo va Endrikni uzoq muddatli loyihaning asosiy qismi deb biladi. Shuningdek, futbolchilarning o‘zi ham “Santyago Bernabeu”da qolishni istayotganini bildirgan. Shu sabab “Chelsi” nafaqat “qirollik klubi” rahbariyati, balki ikki braziliyalik futbolchini ishontirishda ham katta to‘siqlarga duch kelishi mumkinligi aytilmoqda.
Izoh (0)