Qishki transfer oynasida Fransiyaning “Lans” klubidan 33 million funt evaziga “Manchester Siti”ga ko‘chib o‘tgan O‘zbekiston terma jamoasi himoyachisi Abduqodir Husanov uchun Angliyadagi ishlari yaxshi ketmayapti. Ammo shunday bo‘lsa-da, bir qancha taniqli nashrlar futbolchiga nisbatan katta ishonch bildirmoqda. Xususan, Manchestercity.news sayti o‘zbekistonlik himoyachining Angliyadagi qiyinchiliklari va undagi muammolar haqida to‘xtaldi.
Yangi jamoasida hozirgacha 9 ta o‘yinda maydonga tushgan 21 yoshli markaziy himoyachi so‘nggi sakkizta uchrashuvda asosiy tarkibdan joy olmadi. Bu esa muxlislar orasida turli savollar tug‘ilishiga sabab bo‘ldi.
Kin: “Bu oddiy moslashuv bosqichi”
Angliya futbolining afsonalaridan biri Roy Kin yosh futbolchining bu holatidan xavotir olmadi. ITV telekanaliga bergan intervyusida u shunday dedi:
Husanovning omadsiz debyutidan keyin asta-sekin o‘z o‘yinini topayotgani ko‘rinib turibdi. Yangi mamlakat, yangi til, yangi futbolchilar — bularning barchasiga ko‘nikish vaqt talab qiladi. Menimcha, Husanov bu bosqichni yengib o‘tadi. Bu — har bir futbolchi duch keladigan sinov.
“Bornmut”ga qarshi o‘yin: charchoq alomatlari
Husanov fevral oyida “Manchester Siti”da oyning eng yaxshi futbolchisi deb topildi. Bu rahbariyat va muxlislarning unga bo‘lgan ishonchidan darak beradi. Ammo mart oyidagi Jahon chempionati saralashi doirasidagi bahslardagi charchoq alomatlari u uchun qimmatga tushdi.
Milliy jamoa yig‘inidan qaytgan Husanov “Bornmut”ga qarshi o‘yinida o‘ng markaziy himoyachi sifatida harakat qildi. Ammo u mazkur bahsda o‘zini ko‘rsata olmadi: charchoq alomatlari, sariq kartochka sabab Abduqodir tanaffusdan keyin almashtirildi. Aytish kerakki, aynan Husanov o‘rniga maydonga tushgan Niko O’Raylining porlashi “Siti” uchun yutuq bo‘lsa, o‘zbekistonlik himoyachi uchun yomon signal edi.
Yomon start sabablari nimada?
Daily Mail nashrining xabariga ko‘ra, Husanov Angliyaga yo‘l olgan vaqt oralig‘ida bir oy davomida mashg‘ulot o‘tkazmagan. Bu Fransiyadagi qishki tanaffus va transfer jarayonida “Lans” safidan ketgani bilan bog‘liq.
U “Siti” bilan bor-yo‘g‘i bitta mashg‘ulot o‘tkazib, darrov “Chelsi”ga qarshi debyut qilgan edi. O‘sha bahsda xatoga yo‘l qo‘ygan Husanov 54-daqiqada zaxiraga olindi.
Shuningdek, undagi til bilan bog‘liq muammolar, murabbiyning ko‘rsatmalarini to‘liq anglamaslik ko‘p narsani hal qildi. Shu kabi detallar sabab Abduqodirning debyuti yaxshi chiqmadi. Lekin keyingi bahslarda, aniqrog‘i YCHL doirasidagi “Real” bilan uchrashuv yoki APLdagi “Liverpul”ga qarshi o‘yinlarda o‘zbekistonlik himoyachi yaxshi darajasini ko‘rsata oldi.
Abduqodir Husanov — “Siti”ning kelajak uchun qurgan poydevori
Manbalarga ko‘ra, o‘zbekistonlik himoyachi jamoaning kiyinish xonasida ijobiy taassurot qoldirgan. U ayniqsa Vitor Reys bilan yaqin do‘stga aylangan va bu juftlik kelgusida asosiy himoya tandemi bo‘lishi mumkin.
Ammo, chap qanot himoyasida O’Raylining yorqin o‘yini va Ruben Diash – Yoshko Gvardiol juftligi o‘tkazayotgan ajoyib uchrashuvlar evaziga hozirda Pep Gvardiola himoya chizig‘ini o‘zgartirishni istamayapti. Bu esa Husanovning o‘yin amaliyotiga ta’sir qilmoqda.
Lekin klub ichida unga bo‘lgan ishonch yuqori. Ayni damda eng muhim narsa — Husanovning ingliz tilini o‘rganishi, jamoaning o‘yin falsafasini to‘liq anglab yetishi va yozgi tayyorgarlik davrida o‘zining yaxshi tomonlarini ko‘rsatishdir.
21 yoshli himoyachining salohiyatiga shubha yo‘q — “Manchester Siti” skautlari bu transferga katta ishonch bildirishgan. Hozir asosiy muammo — vaqt masalasi. Yaqin orada Husanov klubdagi o‘z o‘rnini topadi. Sababi ko‘plab mutaxassislar uni Premyer Ligadagi yangi yulduzga aylanishiga ishonmoqda.
Izoh (0)