“Bu yana takrorlandi... chunki bu shunchalik ko‘p marta sodir bo‘lganki, endi bu tushuntirib bo‘lmaydigan narsa”, — degan edi “Real”ning sehri haqida Anchelotti o‘tgan mavsum “Bavariya”ga qarshi YCHL yarim finalidan so‘ng (2:1, umumiy hisob 4:3) jurnalistlarga.
Deyarli har mavsumda Madrid klubi kambeklar amalga oshiradi, unutilmas o‘yinlarni taqdim etadi va Chempionlar Ligasida aqlbovar qilmas g‘alabalarga erishadi. Ammo bu mo‘jiza qachon boshlangan? Darhaqiqat, stadionda “qaymoqranglilar”ning 12-o‘yinchisi bo‘lishi va ularga qarshi 90 daqiqa o‘ynash juda uzoqlik qilishi haqida gaplar boshlangandadir?
Mo’jizaning boshlanishi: klub tarixidan abadiy joy olgan dastlabki kambeklar
Ushbu turnirning birinchi finalidayoq “Real” o‘yinni ostin-ustun qilib, g‘alaba qozonishga muvaffaq bo‘lgan. 1955/1956 yilgi mavsum Chempionlar Kubogi (1992-yilgacha turnir nomi shunday edi) uchun birinchisi edi. Finalda Ispaniya (“Real Madrid”) va Fransiya (“Reyms”) chempionati vakillari to‘qnash kelgan.
O‘yinning 10-daqiqasidayoq “Reyms” 2:0 hisobida oldinda borayotgan edi, biroq “qaymoqranglilar”ga hisobni tenglashtirish uchun 16 daqiqa yetarli bo‘ldi. Jamoalar tanaffusga durang natija bilan yo‘l olgandi. Ikkinchi bo‘limda “Reyms” yana hisobda oldinga chiqib oldi. Ispan jamoasi yana muvozanatni tikladi. 79-daqiqada esa oldinga chiqib oldi. Dastlabki Yevrokubok finalida 4:3 hisobi qayd etilgan. “Real” esa dastlabki Chempionlar Kubogining g‘olibiga aylangan. Madridliklar undan keyin yana 4 marta ketma-ket chempionlikni nishonlagan.
Tarixdagi ilk Remontada
1975/76-yilgi mavsumdagi Chempionlar Kubogida “Real” ilk bor birinchi o‘yindagi mag‘lubiyatdan keyin 3 ta to‘p farqini yo‘qqa chiqara olgan. Turnirning 2-turida “Derbi Kaunti” va “Real Madrid” jamoalari o‘zaro bahs olib bordi. Birinchi o‘yin ispan jamoasining 1:4 hisobidagi mag‘lubiyati bilan yakunlandi.
Javob o‘yini esa “Real”ning uy stadionida bo‘lib o‘tgan. 95 ming tomoshabin qarshisida “qaymoqranglilar” Martines, Santilyana va Pirrining gollari evaziga inglizlarni qurolsizlantirdi. G‘olib nomi qo‘shimcha vaqtlarda aniqlanadigan bo‘ldi, ekstra-taymda esa Santilyana ajoyib goli bilan “Madrid”ni keyingi bosqichga olib chiqqan edi.
“Real” yarim finalga qadar yetib borgan va unda bo‘lajak chempion — “Bavariya”ga imkoniyatni boy bergandi.
Oradan 4 yil o‘tib, “Madrid” yana imkonsiz ishni amalga amalga oshirdi, klub yana britaniyalik raqibini taslim etdi. Turnirning chorak finalida Glazgoning “Seltik” jamoasi madridliklarga raqiblik qildi. Dastlabki o‘yin “Seltik Park”da kechgan va unda mezbonlar 2:0 hisobida zafar quchgan. “Real” esa musobaqadan chiqib ketish arafasida edi.
Biroq “Santyago Bernabeu”dagi o‘yin barchasini o‘z o‘rniga qo‘ydi. Santilyana va Shtilike bittadan gol urgandi. O‘yin qo‘shimcha bo‘limlarga qadar davom etishiga qarab ketayotgan bir vaqtda, uchrashuvning 86-daqiqasida Xuanito g‘alaba golini kiritishga muvaffaq bo‘lgan. Shu tariqa “Qirollik klubi” yarim finalga yo‘l olgan. Lekin keyingi bosqichda Germaniyaning “Gamburg” jamoasiga qarshi bahsda yutqazib qo‘ygan.
UEFA Kubogi g‘olibligiga qadar yo‘l. Afsonaviy iboraning paydo bo‘lishi
1984/85-yilgi mavsumdagi UEFA Kubogi uchun esda qolarli sayohatni 2022-yilgi Chempionar Ligasidagi g‘alabaga taqqoslash mumkin. Barchasi turnirning 2-bosqichidan, Yugoslaviyaning “Rieka” jamoasidan boshlangan.
“Qaymoqranglilar” dastlabki o‘yinda kutilmaganda imkoniyatni boy bergan (1:3), agar Isidroning so‘nggi daqiqalarda urgan goli bo‘lmaganda, barchasi achinarli tugashi mumkin edi. Biroq “Bernabeu”dagi o‘yinning 34-daqiqasida Yugoslaviya klubining bir futbolchisi chetlatildi. 67, 79 va 82-daqiqalarda esa gol o‘tkazib yubordi, undan tashqari yana ikki futbolchisi qizil olishga ulgurgan.
Bu Madrid klubining o‘sha turnirdagi aqlbovar qilmas harakatlarining boshlanishi edi. Keyin esa bu yanada ko‘paydi
Keyingi bosqichdayoq Belgiyaning “Anderlext” klubiga qarshi bahsda muammolar boshlandi. “Real” Bryusseldagi og‘ir o‘yinda 0:3 hisobida mag‘lub bo‘ldi.
Ammo “Madrid”ga yirik mag‘lubiyat tetiklashib olishi uchun vosita rolini o‘tadi va “Bernabeu”da “Anderlext” tor-mor etildi. Sanchis 2-daqiqadayoq hisobni ochgan bo‘lsa, Valdano dubl qayd etgan, Emilio esa het-trik muallifiga aylangan.
Keyin yarim final — musobaqadagi eng qiziqarli voqealar. Ispan klubi Milanning “Inter”iga qarshi bahs olib borgan. Birinchi o‘yin Italiyada bo‘lib o‘tgan va unda mezbonlar Liam Bredi va Alessandro Altobellining gollari evaziga g‘alaba qozongan. “Nerazzuri” javob o‘yini oldidan ustunlikka ega bo‘lgandi.
Mag‘lubiyatga qaramasdan o‘yin oxirda Xuanito o‘z xarakterini ko‘rsatib, “Inter” futbolchilariga murojaat qilgan. O‘zining haqoratlarida u o‘lmas iborani qo‘llab o‘tgan: “‘Bernabeu’da 90 daqiqa juda uzoq vaqt”. Bu madridliklarning hali kurashdan chiqmaganini anglatardi.
“Santyago Bernabeu”dagi javob bahsida “Real” Santilyananing dubli va Michelning gollari evaziga 3:0 hisobida g‘alaba qozongan.
Xuanitoning so‘zlari esa “jamoatchilik mulki”ga aylandi va ko‘p o‘tmay “Real” muxlislari bu so‘zlarni italyan tilida bayroqqa yozib, stadion tribunalaridan biriga ilib qo‘ygan.
Finalda esa o‘lmas “Real” “Videoton” klubini tor-mor etgan. “Qirollik klubi”ning o‘sha musobaqadagi chempionligi xuddi afsonaviy Xuanito kabi tarixga o‘chmas qilib muhrlangan.
Tarix takrorlardan iborat
Keyingi 1985/86-yilgi mavsumdagi UEFA Kubogi yana yangi syurprizlarni tayyorladi. Yupp Haynkess boshchiligidagi Gladbaxning “Borussiya”si “Real”ni 5:1 hisobida mag‘lub etdi. Bunday mag‘lubiyatdan keyin, odatda, qayta tiklanish mumkin emasdek edi, biroq “Real” hech qachon bunga rozi bo‘lmasdi. Madridda o‘tgan uchrashuvda esa mezbonlar 4:0 hisobida raqibini yer tishlatgan.
“Real” va “Inter” yana yarim finalda to‘qnash kelgan. Birinchi o‘yin Italiyada bo‘lib o‘tgan, yana “nerazzuri” g‘alaba qozongan, bu safar hisob — 3:1. Javob o‘yinida esa ispanlar 5:1 hisobida zafar quchgan. Finalda esa “qaymoqranglilar” “Kyol”ga qarshi bahs olib borgan va 5:3 hisobida g‘alaba qozongan.
XXI asrda nimalar bo‘ldi?
Darhol Madrid klubi tarixidagi eng muhim lahzalardan biri — 92:46 da urilgan golni yodga olamiz.
“Real”ning Lissabondagi finalda “Atletiko”ga qarshi o‘yini muxlislar yodida butun umr saqlanib qoladi. “Atletiko” 1:0 hisobida g‘alaba qozonayotgan va hakam qo‘shib bergan daqiqalar borayotgan vaqtda, Serxio Ramos burchak zarbasidan oshirilgan to‘pni boshi bilan darvozaga joylab, hisobni tenglashtirgandi. Qo‘shimcha bo‘limlarda esa “Real” yakuniy hisobni 4:1 ko‘rinishiga olib kelgan.
2021/22-yilgi Chempionlar Ligasi ham tarixdan muhim joy oldi. Turnir pley-offida “Real” har bir bosqichda kambek qayd etgan. “PSJ”, “Chelsi” va “Manchester Siti” kabi jamoalar javob bahslarida kambek evaziga mag‘lub etilgan. “Shaharliklar”ga qarshi o‘yin umuman qoyilmaqom kechgan.
Angliyadagi birinchi o‘yin Manchester klubining 4:3 hisobidagi g‘alabasi bilan yakunlangan. Javob o‘yinida esa “Real” vaziyatni o‘nglash uchun bitta gol kiritishi lozim edi. Biroq 73-daqiqada madridliklar yana to‘p o‘tkazib yuboradi. Endi qolgan 15 daqiqa ichida 2 ta gol kerak edi. So‘nggi daqiqalarda esa o‘yin taqdiri hal bo‘lgandek edi, ammo Rodrigo imkonsiz narsani amalga oshirgan. 90 va 90+1-daqiqada braziliyalik futbolchi dubl qayd etib, o‘yinni qo‘shimcha bo‘limlargacha borishiga hissa qo‘shgan. Qo‘shimcha bo‘limlarda esa “Real” toza penalti ishlab olgan va Karim Benzema uni xotirjamlik bilan amalga oshirgan. Yakuniy hisob 6:5, madridliklar foydasiga. Musobaqa finalida esa “Real” “Liverpul”ni Vinisiusning goli evaziga mag‘lub etib, 14-sovrinini boshi uzra ko‘targan.
O‘tgan mavsumda esa yana bir ertak guvohiga aylandik. “Bavariya” o‘z uyida 2:2 hisobini qayd etgan. “Bernabeu”dagi o‘yinda esa 1:0 hisobida oldinda borayotgan edi. O‘yin tugashiga 2 daqiqa qolganida “Real” hujumchisi Xoselu Manuel Noyerning xatosidan foydalanib, hisobni tenglashtirdi. Oradan 2 daqiqa o‘tib, yana Xoselu darvozani aniq nishonga olib, stadionni larzaga soldi.
Xuanitoning 40 yil oldin aytgan gapi “Bavariya”ga qarshi o‘yin uchun ham ishladi. Finalga chiqishini tantana qilishga tayyorlanayotgan raqibni xafa qilish va o‘yin taqdirini o‘zgartirib yuborishi uchun Xoseluga 163 soniya kifoya qildi.
“Barchasi holatga bog‘liq. Lekin “Real”da nimadir bor, chunki bunday kambeklar o‘z-o‘zidan sodir bo‘lmaydi. Balki barchasi klubning tarixi, an’analari va sifatiga bog‘liqdir. Bu savolga aniq javob berolmayman, biroq bu narsa juda ko‘p marta sodir bo‘lgan. Shuning uchun bu aniq tasodif emasligini ayta olaman”, — degan edi Karlo Anchelotti.
“Real” hozir ham qadrlanadigan yengilmas jamoa afsonasini yaratdi. Bu munosib e’tirof ekanligini aytish mumkin. Shuning uchun “Real” futbolchisi hakam tomonidan qo‘shib berilgan daqiqalarda g‘alaba golini urishi baxtli tasodif emas, meros sifatida qabul qilinadi.
“Real”ning uy stadioni ideal yodgorlikka, imkonsiz narsalar sodir bo‘ladigan o‘lmas jamoaning uyiga aylangan. Mo‘jizalar maydoni. “Real”ning butun tarixi davomidagi epik va qahramonona tabiati xuddi uning DNKsi singari singib ketgan.
Izoh (0)