Ушбу мавсумда Англия Премьер Лигасида чемпионлик масаласида интрига йўқолди. Кўплаб мутахассислар мавсум ўртасида “Ливерпуль” чемпионликни қўлга киритишини тахмин қилган бўлса-да, улар апрель ойида буни расмийлаштирди. Аммо чемпионатда битта интрига бор — Чемпионлар Лигаси йўлланмаси учун кураш. Мусобақа якунланишига 2 тур қолди, аммо кейинги мавсум Англиядан қайси жамоалар клублар ўртасидаги энг нуфузли турнирда қатнашишига аниқлик киритилмаган.
Бу йил Англия Премьер Лигасидан бирданига 5 та клуб мазкур чемпионатга йўл олади. Шунингдек, Европа Лигаси ғолиби — “Манчестер Юнайтед” ёки “Тоттенҳэм” ҳам қўшимча квота сифатида Чемпионлар Лигасида қатнашади. Ҳозирча унда қатнашадиган бир жамоа номи маълум — “Ливерпуль”. Қолган 4 та йўлланма учун 6 та клуб баҳсларга киришган. Муҳим эслатма, агар жамоаларнинг очколари тенг бўлиб қолган тақдирда асосий кўрсаткич сифатида мусобақадаги тўплар фарқи ҳисобга олинади.
“Арсенал” – 99,9%
Микель Артета жамоаси учун Чемпионлар Лигаси йўлланмаси деярли кафолатланган. Охирги икки турда кимга қарши ўйнашидан қатъи назар, “канонирлар” мусобақа чиптасини қўлдан чиқариши имконсиз. Ҳатто қолган иккала ўйинда ҳам мағлубиятга учраса-да, кучли бешликдан тушиб кетиш эҳтимоли паст.
Бунга асосий сабаб — “Ноттингем” ва “Челси” ўзаро тўқнаш келиши, яъни ушбу жамоалар ўртасидаги баҳсда қайсидар жамоа ёки иккаласи ҳам очко йўқотади. Агар навбатдаги турларда “Ноттингем” ғалаба қозониб, “Арсенал” ютқазса ҳам, тўплар фарқи “канонирлар” фойдасига қолади. Шу боис Лондон грандининг кейинги мавсум ЕЧЛда қатнашиши деярли аниқ, лекин назарий жиҳатдан қолганларда имконият бор. Кейинги турда “Арсенал” буни 100 фоизга аниқ қилиши кутилмоқда.
“Ньюкасл” – 95,5%
Эдди Ҳау шогирдлари мавсум охирига келиб яхши спорт формасига кириб олди. Жоэлинтоннинг жароҳатига қарамай, клуб кучли ўйин намойиш қилмоқда. Олдинда “қарғалар”ни “Арсенал”га қарши сафардаги ўйин ва “Эвертон”га қарши уй учрашуви кутиб турибди.
“Ньюкасл” Европа Чемпионлар Лигасига чиқиш имконияти яхши. Агар улар навбатдаги баҳсларда битта ғалабани қўлга киритса, буни расмийлаштиради.
Баъзи сценарийларда ҳаттоки битта дуранг ҳам кифоя қилади. Бу “Челси” ва “Ноттингем” ўртасидаги баҳс ҳамда “Астон Вилла”нинг тўплар фарқидаги ёмон натижаси эвазига қўлга киритилиши мумкин. Агар улар икки баҳсда ҳам мағлубиятга учраса-да, назарий жиҳатдан имконият сақланиб қолади. Лекин бунинг эҳтимоли жуда паст.
“Манчестер Сити” – 92,7%
Пеп Гвардиола жамоаси мавсум ўрталарида инқирозга учраган эди. Бироқ кейинчалик ҳолатни барқарорлаштиришди ва айни пайда Чемпионлар Лигаси йўлланмасини қўлга киритиш учун жуда яқин турибди.
“Шаҳарликлар”нинг ҳисобида “Ньюкасл”дан 1 та кам очко бор. Лекин бу жамоалардаги ҳолат деярли бир хил — қолган 2 баҳсда 1 та ғалаба етарли. Учрашувлар эса унчалик кучли бўлмаган жамоаларга қарши: “Борнмут” билан уйда ва “Фулҳэм”га қарши сафарда. Агар “Сити” иккала баҳсда ҳам имкониятни бой берса, ЕЧЛ йўли деярли ёпилади. Лекин мавсум сўнгги эканлиги ҳамда рақиб жамоалар ўртамиёна эканлиги ҳисобига “шаҳарликлар”нинг ҳолатини ёмон деб бўлмайди.
“Челси” – 56,3%
Энсо Мареска бошчилигидаги “Челси” айни пайт турнир жадвалида 5-ўринни эгаллаб турибди. Бу ҳолатда Чемпионлар Лигаси йўлланмасини қўлга киритиш учун сўнгги икки ўйинда фақат ғалаба зарур. Агар “Челси” 6 очко тўпласа, деярли кафолатланган ҳолда мусобақа чиптасини қўлга киритади.
Назарий жиҳатдан “Астон Вилла” ҳам 6 очко тўплаб, тўплар фарқи эвазига Лондон клубини қувиб ўтиши мумкин. Аммо ҳозир “Челси” рақибидан 12 та гол фарқи билан олдинда. Унинг учун “Вилла” кейинги икки учрашувда камида 15 марта гол уриб, ўз дарвозасидан гол ўтказиб юбормаслик талаб қилинади. Аммо бундай сценарийни амалга ошиш фоизи 0 га тенг.
Шу боис, “аристократлар” қолган икки беллашувда ўзи учун керакли очколарни қўлга киритса кифоя қилади. Лондонликлар сўнгги турларда “Манчестер Юнайтед” (уйда) ва “Ноттингем Форест” (сафарда)га қарши майдонга тушишади.
“Астон Вилла” – 37,9%
Унаи Эмери жамоаси ушбу мавсум Европа Чемпионлар Лигаси даражасида ўйин кўрсата олшини исботлади. Улар турнирда ажойиб қатнашиб, чорак финалгача етиб келди. Бироқ бу мавсум мусобақа учун йўлланма олиш осон кечмаяпти. “Астон Вилла”ни олдинда “Тоттенҳэм” (уйда) ва “Манчестер Юнайтед” (сафарда) билан ўйинлар кутмоқда.
Рақиблар ҳозирда яхши формада эмас, бироқ “Вилла”нинг ЕЧЛга чиқиши учун фақат ўз ўйинлариги ғалаба етарли эмас. Юқорида айтилганидек, уларда тўплар фарқи жуда ёмон. Агар турнирга боришни истаса, жуда йирик ҳисобларда ғалаба қозониши талаб этилади. Лекин бу жуда қийин. Масалан, “Челси” 8:0 ютқазиб, “Вилла” 8:0 ютса ҳам, бу сценарий амалда рўй бериши қийин.
Энг реал вариант — рақиблар, хусусан “Сити” ёки “Челси” очко йўқотиши ва “Вилла” бундан фойдаланиши.
“Ноттингем Форест” – 17,8%
“Ноттингем” узоқ вақт кучли учликда юрди. Аммо сўнгги ҳафталарда натижалар кескин пасайди: 6 турда атиги 1 та ғалаба. Энди эса улар Чемпионлар Лигаси учун рақибларининг омадсизликка учрашини кутиши керак.
Жамоа учун яхши томони — “Челси” билан бевосита тўқнашув мавжудлиги. Яъни бу ўйинда ғалаба қозониш орқали бевосита рақибдан очко тортиб олиш мумкин.
Бироқ бунга эришиш учун аввал “Вест Ҳэм”ни сафарда мағлуб этиш талаб этилади. Сўнг “Челси” устидан ғалаба ва рақиблар — “Вилла” ёки “Челси”нинг бошқа ўйинларда ҳам очко йўқотишини кутиши талаб этилади.
Хулоса ўрнида шуни айтиш мумкинки, Англия Премьер Лигасида чемпион номи олдинроқ маълум бўлган бўлса-да, Чемпионлар Лигаси йўлланмаси учун кураш охирги турларгача сақланиб қолди. “Ливерпуль” аллақачон ЕЧЛ йўлланмасини қўлга киритган. Эндиликда қолган тўртта ўрин учун “Арсенал”, “Ньюкасл”, “Манчестер Сити”, “Челси”, “Астон Вилла” ва “Ноттингем Форест” клублари ўз имкониятларини ишга солмоқда.
Энг қулай ҳолат “Арсенал” ва “Ньюкасл”да – улар деярли Чемпионлар Лигаси иштирокчисига айланиб бўлган. “Манчестер Сити” ҳам якуний босқичда керакли очколарни қўлга киритса, асосий вазифани уддалайди. “Челси” эса ўз қўлида бўлган имкониятни бой бермасликка ҳаракат қилади – айниқса, “Ноттингем” билан ҳал қилувчи ўйин ҳал қилувчи рол ўйнаши мумкин. “Астон Вилла” ва “Ноттингем Форест” эса рақибларнинг хатоларига умид қилмоқда.
Шундай қилиб, якуний икки тур футбол ишқибозлари учун юқори даражадаги интрига ва кутилмаган бурилишларга бой бўлиши аниқ. Қайси жамоа мусобақа йўлланмасини қўлга киритади — барчаси майдондаги ўйинларда ҳал бўлади.
Изоҳ (0)