Qoraqalpog‘istonning Nukus shahrida Soliq boshqarmasidan tadbirkorga 5,7 mlrd so‘m undirib berildi. Bu haqda MIB axborot xizmati “Daryo”ga xabar berdi.
Unda aytilishicha, Majburiy ijro byurosi Qoraqalpog‘iston Respublikasi boshqarmasi tomonidan byuroning quyi bo‘limlariga byudjet tashkilotlaridan qarzdorliklarni undirish bo‘yicha joriy yilning 22-mart kuni ko‘rsatma berilgan.
Ushbu ko‘rsatmaga asosan birgina byuroning Nukus shahar bo‘limi tomonidan amalga oshirilgan majburiy ijro harakatlari natijasida bo‘lim ish yurituvidagi 29 mlrd 754 mln so‘mlik 433 ta ijro hujjatlaridan 7 mlrd 796 mln so‘mlik 256 tasining ijrosi ta’minlanib, amalda 6 mlrd 163 mln so‘m undirilgan.
Masalan, Nukus tumanlararo iqtisodiy sudining ijro hujjatiga asosan qarzdor Qoraqalpog‘iston Respublikasi Soliq boshqarmasidan “Xalqabad paxta tazolash” AJ foydasiga jami 5 mlrd 706 mln so‘m qarz undirish belgilangan.
Byuroning Nukus shahar bo‘limi davlat ijrochilari tomonidan olib borilgan ijro harakatlar natijasida undirilishi lozim bo‘lgan qarzdorlik joriy yilning 11-aprel kuni to‘lig‘i bilan undirilib, tadbirkorning buzilgan huquqlari tiklangan.
Hozirgi kunda ushbu toifadagi ijro hujjatlari ijrosini ta’minlash maqsadida qarzdorga tegishli bo‘lgan barcha mol-mulklarga taqiq o‘rnatish, byudjet tashkilotlarining rahbarlariga sud qarorini ixtiyoriy ravishda bajarmagani uchun qo‘shimcha jarimalar solish kabi ijro harakatlari davom ettirilmoqda.
Bundan avval tadbirkorning binosini buzib tashlagani uchun Toshkent shahar hokimligidan 1 mlrd so‘m undirilgani haqida xabar berilgandi. Shuningdek, Navoiyda biznes-ombudsman aralashuvi bilan autsorserga 886,5 mln so‘m undirib berilgan edi.
Izoh (0)