Andijon viloyatining Marhamat tumanida uylari buzilib, yer uchastkalari davlat ehtiyoji uchun olib qo‘yilgan 61 nafar fuqaroga kompensatsiya pullari undirib berildi. Bu haqda MIB viloyat boshqarmasi axborot xizmati ma’lum qildi.
Ma’lum bo‘lishicha, 2019-yilda Marhamat tumani markazi “Obod tuman” davlat dasturiga kiritilgan. Tuman markazidagi Mustaqillik ko‘chasida yashovchi fuqarolarning uylari old qismi buzilib, yer uchastkalari davlat ehtiyoji uchun olib qo‘yilgan.
Shunga ko‘ra, fuqarolik ishlari bo‘yicha Asaka tumanlararo sudining ijro hujjatlariga asosan qarzdor “Andijon viloyati hokimligi huzuridagi davlat va jamiyat ehtiyojlari uchun yer uchastkalarining olib qo‘yilishi munosabati bilan jismoniy va yuridik shaxslarga yetkazilgan zararlarni qoplash bo‘yicha markazlashtirilgan jamg‘armasi”dan undiruvchi Marhamat tumanida yashovchi 65 nafar fuqaro foydasiga jami 7,8 mlrd so‘m miqdorida yetkazilgan zararlarni (kompensatsiya) undirish belgilangan.
Majburiy ijro byurosi Andijon shahar bo‘limi tomonidan belgilangan tartibda ijro harakatlari amalga oshirilib, joriy yilning noyabr—dekabr oyi davomida 61 nafar fuqaroga jami 6 mlrd 600 mln so‘m kompensatsiya pullari undirib berilgan.
Hozirda 4 nafar fuqaroning salkam 1 mlrd so‘m haqdorligini undirish bo‘yicha ijro harakatlari davom etmoqda.
Izoh (0)