Қорақалпоғистоннинг Нукус шаҳрида Солиқ бошқармасидан тадбиркорга 5,7 млрд сўм ундириб берилди. Бу ҳақда МИБ ахборот хизмати “Дарё”га хабар берди.
Унда айтилишича, Мажбурий ижро бюроси Қорақалпоғистон Республикаси бошқармаси томонидан бюронинг қуйи бўлимларига бюджет ташкилотларидан қарздорликларни ундириш бўйича жорий йилнинг 22 март куни кўрсатма берилган.
Ушбу кўрсатмага асосан биргина бюронинг Нукус шаҳар бўлими томонидан амалга оширилган мажбурий ижро ҳаракатлари натижасида бўлим иш юритувидаги 29 млрд 754 млн сўмлик 433 та ижро ҳужжатларидан 7 млрд 796 млн сўмлик 256 тасининг ижроси таъминланиб, амалда 6 млрд 163 млн сўм ундирилган.
Масалан, Нукус туманлараро иқтисодий судининг ижро ҳужжатига асосан қарздор Қорақалпоғистон Республикаси Солиқ бошқармасидан “Халқабад пахта тазолаш” АЖ фойдасига жами 5 млрд 706 млн сўм қарз ундириш белгиланган.
Бюронинг Нукус шаҳар бўлими давлат ижрочилари томонидан олиб борилган ижро ҳаракатлар натижасида ундирилиши лозим бўлган қарздорлик жорий йилнинг 11 апрель куни тўлиғи билан ундирилиб, тадбиркорнинг бузилган ҳуқуқлари тикланган.
Ҳозирги кунда ушбу тоифадаги ижро ҳужжатлари ижросини таъминлаш мақсадида қарздорга тегишли бўлган барча мол-мулкларга тақиқ ўрнатиш, бюджет ташкилотларининг раҳбарларига суд қарорини ихтиёрий равишда бажармагани учун қўшимча жарималар солиш каби ижро ҳаракатлари давом эттирилмоқда.
Бундан аввал тадбиркорнинг биносини бузиб ташлагани учун Тошкент шаҳар ҳокимлигидан 1 млрд сўм ундирилгани ҳақида хабар берилганди. Шунингдек, Навоийда бизнес-омбудсман аралашуви билан ауцорсерга 886,5 млн сўм ундириб берилган эди.
Изоҳ (0)