Ispaniyada ikki ayoldan umumiy hisobda 360 ming AQSH dollari miqdorda pulni aldov yo‘li bilan o‘zlashtirgan besh nafar jinoyatchi qo‘lga olindi. Firibgarlar o‘zlarini Gollivud aktyori Bred Pitt deb tanishtirgan.
Kiberjinoyatchilar aktyor Bred Pittga bag‘ishlangan fanatlar guruhi ichidan o‘ziga qurbonlar izlagan. Ular ijtimoiy tarmoqlar orqali potensial qurbonlarning psixologik portretini tuzgan va ruhiy tushkunlik, depressiya alomatlari mavjud, hissiy jihatdan zaif ayollarni saralab olgan.
So‘ng ular bilan messenjer yoki elektron pochta orqali bog‘langan. Firibgarlar sodda ayollarga aktyor nomidan romantik mavzularda yoza boshlagan va ularga go‘yoki qo‘shma loyihalar uchun sarmoya kiritishni taklif qilgan. Ularning so‘zlariga ishongan ikki nafar jabrlanuvchi avvaliga 5-6 ming yevrodan pul o‘tkazmalarini amalga oshirgan.
2023-yil avgust oyida Granada shahridan aldangan ayol huquq-tartibot idoralariga murojaat qilgach, tekshiruv ishlari boshlangan. Keyinchalik, biskayalik ayol bilan ham xuddi shunday holat sodir bo‘lgani aniqlangan.
“Bralina” deb nomlangan tergov operatsiyasi davomida jabrlanuvchilarga o‘g‘irlangan pullarning bir qismi — 95 ming dollar miqdori undirib berildi. Hozirda tergov harakatlari davom etmoqda.
Bundan tashqari, granadalik ayolning o‘g‘li onasining hisobidan 17 ming yevro o‘g‘irlagani ma’lum bo‘ldi, ammo politsiya so‘zlariga ko‘ra, bu holatning kiberfiribgarlarga aloqasi yo‘q.
Izoh (0)