Biznes-ombudsman Navoiy viloyati Qiziltepa tumanidagi maktabgacha taʼlim bo‘limi xodimlarining harakatlaridan norozi bo‘lib murojaat yo‘llagan tadbirkorning muammolarini hal etib berdi.
Aniqlanishicha, tadbirkor shartnoma asosida 2023-yilning sentyabr oyidan dekabr oyiga qadar 4 oy davomida autsorsing usulida ovqatlantirish xizmati ko‘rsatib kelgan. Biroq ko‘rsatilgan xizmat uchun yuzaga kelgan 886,5 million so‘m qarzdorlikni to‘lash paysalga solinib, to‘lovni qilish o‘rniga tadbirkorga nisbatan turli xil tekshiruvlar amalga oshirish holatlari kuzatilgan.
O‘z o‘rnida bu holat tadbirkorning faoliyatiga salbiy taʼsir o‘tkazib, mahsulotlar yetishmovchiligi, ish haqi, soliq va boshqa bir qancha to‘lovlarni amalga oshirishda qiyinchiliklarni yuzaga keltirgan, — deyiladi xabarda.
Biznes-ombudsman aralashuvi bilan tadbirkorning muammosi ijobiy hal qilingan va mavjud qarzdorlik tadbirkorga to‘lab berilgan.
Avvalroq biznes-ombudsman aralashuvi bilan Namangan viloyatining Kosonsoy tumanida tadbirkor murojaatini o‘z vaqtida ko‘rib chiqmagan “Hududgaz Namangan” korxonasi vakili javobgarlikka tortilgandi.
Izoh (0)