Kanada shimolida paleontologlar ankilozavrlar oilasiga mansub yangi dinozavr turining izlarini aniqladilar. Taxminan 100 million yillik noodatiy izlar Britaniya Kolumbiyasining qadimdan qazilma qoldiqlari bilan mashhur Tumbler Ridge hududidan topildi. Tadqiqot natijalari Journal of Vertebrate Paleontology jurnalida e’lon qilindi.
Ta’kidlanishicha, uch barmoqli izlar ankilozavrlarga xos bo‘lgan izlardan keskin farq qilgani sababli, olimlar ularni yangi tur sifatida ajratishga qaror qilishgan.
Orqa oyoqlarning uch barmoqli izlari bo‘r davri yotqiziqlarida aniqlangan. Orqa oyoqlarida to‘rttadan barmog‘i bo‘lgan boshqa guruh vakillaridan farqli o‘laroq, bu dinozavr uchta yirik barmoqli iz qoldirgan. Tahlillar shuni ko‘rsatdiki, ular ilgari tavsiflanmagan, Ruopodosaurus clava deb nomlangan turga tegishli bo‘lishi mumkin.
Izlarning raqamli qayta tiklash usuli hayvonning taxminiy ko‘rinishini aniqlashga imkon bergan. U taxminan 5-6 metr uzunlikda, tikanlari va zirhi bor, ehtimol dumida to‘qmoq ham bo‘lgan. E’tiborli jihati shundaki, oldingi panjalarning izlari — yarim oy shaklidagi beshta barmog‘i ham saqlanib qolgan. Barcha izlar YUNESKOning Tumbler Ridge geoparkida va G‘arbiy Alberta hududida topildi.
Shu paytgacha ankilozavridlar Shimoliy Amerika hududidan bo‘r davrining o‘rtalarida, taxminan 100—84 million yil oldin yo‘q bo‘lib ketgan deb hisoblanar edi. Biroq bu topilma mazkur farazni inkor etib, o‘sha davrda qit’ada bir vaqtning o‘zida ikkita oila — ankilozavridlar va nodozavridlar yashaganligini isbotladi.
Avvalroq, Yangi Zelandiya olimlari 2200-yilga kelib yer yuzidagi sudralib yuruvchilar gigant hajmga yetishini aniqlashgandi.
Gonkongda ilk bor taxminan 145—66 million yil oldin yashagan bo‘r davri dinozavr qoldiqlari topilgani xabar berilgadi. Shuningdek, xitoylik olimlar Xitoy janubi-sharqidagi Szyansi provinsiyasida toshga aylangan dunyodagi eng kichik dinozavr tuxumini topgani ma’lum qilingandi.
Izoh (0)