Hindistonning Rurkie texnologiya instituti va Hindiston geologiya xizmati olimlari mamlakat g‘arbida 167 million yil avval yashagan o‘txo‘r dinozavrlarning qoldiqlarini topdi. Bu haqda Press Trust of India xabar bermoqda.
Rajastan shtatining Jaysalmer shahri yaqinidagi Tar cho‘lida qazish ishlari to‘rt yildan ortiq davom etmoqda. Topilgan qoldiqlar dikreozavrlar oilasiga mansub dinozavrga tegishli. Paleontologlar dinozavr umurtqa pog‘onasining bir qismini, bo‘yin va tana qismi suyaklarini, quyruq va qovurg‘alarini qazib olishga muvaffaq bo‘lishdi.
Hind olimlarining ta’kidlashicha, gap dikreozavrlarning yangi turini kashf etish haqida ketmoqda. Ular topilgan dinozavrga qazishmalar olib borilgan Tar cho‘li nomidan kelib chiqqan holda Tharosaurus indicus nomini berishdi.
Dikreozavrlar oilasining dinozavrlari Yura davrining o‘rta davrida yashagan. Ular uzun bo‘yin va quyruq, kichik bosh, shuningdek, zamonaviy fillarning oyoqlariga o‘xshash katta oyoq-qo‘llari bilan ajralib turardi. Ushbu turdagi qadimiy kaltakesaklarning qoldiqlari birinchi marta Hindistonda topilgan.
Izoh (0)