1994-yilgi Budapesht memorandumi bo‘yicha Ukrainaning xavfsizlik kafolatlari bajarilmagani natijasida sayyora Yevropa markazida ikkita “ekologik bomba” — Qrim va Donbassning bir qismiga ega bo‘ldi. Ukraina prezidenti Vladimir Zelenskiyning bu boradagi bayonoti BMTning iqlim bo‘yicha Glazgoda o‘tkazilgan konferensiyasida ma’lum qilingan, deb xabar beradi “RBK”.
“Noyob flora va fauna olamiga ega Qrim yarimoroli Rossiya harbiy dengiz kuchlarining bazasiga aylandi. Donbassning bir qismida esa suv bosgan shaxtalar, tuproq degradatsiyasi, ichimlik suvi yetishmovchiligi kuzatilmoqda. Bizning zamonimizda falokat qayerda bo‘lmasin, barchaga taalluqli”, — deydi Zelenskiy Chernobil falokatini eslatib.
Shuningdek, Zelenskiy insonlar sayyorani qutqarish bo‘yicha biror chora ko‘rmasa, nima sodir bo‘lishini ham aytib o‘tgan.
“Biz taslim bo‘lishimiz mumkin. Suv toshqinlari va yong‘inlari har hafta sodir bo‘ladi. Dengizlarda faqat kimyoviy himoya kostyumlarida cho‘mila olamiz. Umrimizning qolgan qismini respiratorlarda o‘tkazamiz. Toza ichimlik suvi — faqat dam olish kunlari. Zaharli bo‘lmagan tuproqda yetishtirilgan mahsulotlar — faqat Yangi yil va alohida bayramlarda. Dunyoda o‘rtacha umr ko‘rish davomiyligi 25-30 yil. Bu biz, insoniyat uchun adolatli jazo bo‘lishi mumkin. Va sayyora bizniki emasligini unutib qo‘yganlar uchun — bu sayyora ayiqlar, yo‘lbarslar, pandalar, koalalar, kit va akulalarniki”, — deya prognoz qiladi Ukraina prezidenti.
2021-yilning iyunida Ukraina Ekologiya vazirligi 30-40 yildan so‘ng iqlim o‘zgarishi sabab mamlakatda cho‘llashish kuzatilishini prognoz qilgandi. “Olimlarning ma’lumotlariga ko‘ra, Ukraina iqlim o‘zgarishi sabab o‘ta yuqori harorat va ob-havo falokatlari zonasiga o‘tmoqda. Yaqin 30-40 yil ichida mamlakatning katta qismi cho‘llashishi xavfi bor”, — deyiladi idora bayonotida.
Avvalroq Birlashgan Millatlar Tashkiloti Frenki ismli dinozavr dunyo yetakchilariga murojaat qilib, insoniyatni iqlim o‘zgarishi xavfidan ogohlantirgani aks etgan videorolikni e’lon qilgandi.
Izoh (0)