Paleontologlar bir paytlar hozirgi Peru hududining bir qismini qoplagan okeanda yashagan, zamonaviy kitlarning qadimiy ajdodi bo‘lgan yovvoyi dengiz yirtqich hayvonining bosh suyagini topdi.
Taxminan 36 million yil davomida yaxshi saqlanib kelgan bosh suyagi Peru janubidagi Okkaje cho‘lida qoyalar orasidan, qator uzun, o‘tkir tishlari bilan buzilmagan holda qazib olingan.
Olimlarning fikriga ko‘ra, bu qadimgi sutemizuvchi bazilozavr bo‘lib, u suvda yashovchi kitlar oilasiga mansub, uning zamonaviy avlodlari kitlar, delfinlar va dengiz cho‘chqalarini o‘z ichiga oladi.
Bazilozavr “qirol kaltakesak” degan ma’noni anglatadi, garchi hayvon sudraluvchi bo‘lmasa-da, uning uzun tanasi bahaybat ilon kabi harakatlangan bo‘lishi mumkin.
Yirtqichning uzunligi taxminan 12 metr yoki to‘rt qavatli binoning balandligiga teng bo‘lgan.
“Bu kashfiyot juda muhim, chunki bosh suyagi mukammal saqlanib qolgan”, — dedi Peruning San-Markos milliy universiteti paleontologiya bo‘limi boshlig‘i Rodolf Salas. U universitet muzeyida namoyish etilgan bosh suyagi bazilozavrning yangi turiga tegishli bo‘lishi mumkinligini qo‘shimcha qildi.
“Bu hayvonlar o‘z davrining eng katta yirtqichlari bo‘lgan”, — dedi Salas.
Olimlarning fikricha, birinchi kitsimonlar taxminan 55 million yil oldin quruqlikda yashagan sutemizuvchilarning avlodi bo‘lgan.
Salasning ta’kidlashicha, qadimgi bazilozavr o‘lganida, uning bosh suyagi dengiz tubiga tushib ketgan va u yerda ko‘milgan holda yaxshi saqlanib qolgan.
Izoh (0)