Portugaliyaning Pombal shahrida qazish ishlari chog‘ida dinozavr qoldiqlari topildi, deb yozadi “Interfaks”. Taxminlarga ko‘ra, bu Yevropada topilgan eng yirik dinozavr suyaklaridir.
The Guardian xabariga ko‘ra, qazish ishlari 2017-yilda, yer maydoni egasi toshga aylangan hayvon qoldiqlarini topib olib, Lissabon universitetiga murojaat qilganidan keyin boshlangan.
Voqea joyida Ispaniya va Portugaliya paleontologlari ishlamoqda. Ular umurtqa pog‘onasi va qovurg‘a suyaklarini topdi. Aniqlangan dinozavr, mutaxassislar fikriga ko‘ra, zavropodlar guruhidagi braxiozavridlar oilasiga tegishli bo‘lgan.
Zavropodlar — bo‘yni va dumi uzun bo‘lgan to‘rt oyoqli o‘txo‘r dinozavrlar guruhi. Ular Yerda mavjud bo‘lgan eng yirik hayvonlardir.
Aniqlangan dinozavrning balandligi 12 metr, uzunligi 25 metrga yetgan. Topilma 150 million yoshda deb taxmin qilinmoqda.
Olimlar qayd etishicha, bunday topilmalar juda kamdan-kam uchraydi. Bundan tashqari, suyaklarning joylashuvi hayvonning tabiiy anatomik joylashuvini aks ettiradi. Bu esa dinozavrning boshqa qismlari ham topilishini taxmin qilish uchun asos bo‘la oladi.
Izoh (0)