Tinch okeanida joylashgan orol-davlatlardan biri Tuvalu tashqi ishlar vaziri Saymon Kofe Birlashgan Millatlar Tashkilotining iqlim muammolari bo‘yicha konferensiyasidagi (COP26) nuqtini o‘zgacha — tizzasigacha suvda turgan holatda so‘zladi. Bu haqda Reuters xabar qildi.
Saymon Kofening kostyum va bo‘yinbog‘ bilan suv ichida turgani aks etgan videolavha ijtimoiy tarmoqlarda keng tarqaldi. Bu orqali Tuvaludagi dengiz sathining ko‘tarilishi bilan bog‘liq muammoga e’tibor qaratildi.
“Tuvaluning adliya, aloqa va tashqi ishlar vaziri Saymon Kofe iqlim o‘zgarishi xavfidan ogohlantirishning hech kimnikiga o‘xshamagan, ta’sirli usulidan foydalandi”, — deyiladi xabarda.
Kofening qayd etishicha, mamlakat hozirda iqlim o‘zgarishi va dengiz sathi ko‘tarilishi oqibatlariga qarshi kurashib kelmoqda.
Video Tuvalu poytaxti Funafuti shahridagi TVBC jamoat teleradiokompaniyasi tomonidan suratga olingan va 9-noyabr kuni BMT sammitida namoyish etish uchun tayyorlangan.
Tuvalu — Okeaniyada, Tinch okeanining janubi-g‘arbiy qismida joylashgan davlat. Aholisi 11 206 kishini tashkil etadi. Ularning ko‘pchiligi tuvalular. Rasmiy til — ingliz tili, shuningdek, polineziya tillaridan biri — tuvalular tilida ham so‘zlashiladi.
Eslatib o‘tamiz, COP26 Buyuk Britaniyaning Glazgo shahrida 31-oktabrda boshlangan va 12-noyabrgacha davom etadi. Unda 200 ga yaqin davlatdan vakillar ishtirok etishi kutilmoqda. Iqlim bo‘yicha sammit doirasida dastlab dunyoning 100 dan ortiq yetakchilari 2030-yilga borib o‘rmonlarning yo‘qolib ketishi jarayonini to‘xtatishga kelishib oldi.
Avvalroq BMTning iqlim sammitida 40 dan ortiq davlat ko‘mirdan foydalanishni kamaytirish to‘g‘risida shartnoma imzolagani xabar qilingandi. Shuningdek, Tojikiston prezidenti Emomali Rahmon BMT sammitida mamlakatdagi iqlim o‘zgarishi muammolarini sanab o‘tgandi. Sammit boshlanishiga uch kun qolganda esa Glazgo shahrini suv bosgan.
Mavzuga doir:
Izoh (0)