Rossiya qo‘shinlarining Ukrainaga keng ko‘lamli bosqini boshlanganidan keyin Rossiyadan Isroilga ko‘chib o‘tgan qo‘shiqchi Alla Pugachyova Moskvaga qaytib keldi. Ushbu ma’lumotni 3-noyabr kuni ertalab Pugachyovaning yordamchisi Yelena Chuprakova “TASS” agentligiga tasdiqladi.
2-noyabr oqshomida “RIA Novosti” va Baza nashrlari manbalarga tayanib, Pugachyova Pskov viloyatidagi chegara punkti orqali Rossiyaga kirganini xabar qilgandi.
Pugachyovaning yordamchisi xonandaning Moskvaga nima sababdan kelganini oshkor etmadi. Xonanda Moskvada qancha vaqt o‘tkazishni rejalashtirayotgani haqidagi savolga Chuprakova “bu noma’lum” deb javob berdi.
Alla Pugachyova turmush o‘rtog‘i Maksim Galkin “xorijiy agent” deb e’lon qilinganidan ko‘p o‘tmay Rossiyani tark etgandi.
Pugachyova turmush o‘rtog‘ini qo‘llab-quvvatlovchi post e’lon qilib, unda o‘zini ham “suyukli mamlakatining xorijiy agentlari” qatoriga kiritishni so‘ragan. Pugachyova Rossiyaning vatanparvari bo‘lgan turmush o‘rtog‘i bilan birdam ekanini bildirib, o‘z mamlakatiga “tinch hayot” va “xayoliy maqsadlar uchun” odamlarning o‘limiga chek qo‘yishini tilashini aytgan. Xonandaning posti yuz minglab layk to‘plagan. Ko‘p o‘tmay u Maksim Galkin bilan Isroilga yashash uchun ketganini e’lon qildi.
HAMASning Isroilga hujumidan so‘ng Maksim Galkin video e’lon qildi, unda Galkin “Alla Pugachyova bilan o‘zimizni shu yerga tegishlidek his qilamiz, shunday birlashgan xalqning bir qismi ekanimizdan faxrlanamiz va ketish niyatimiz yo‘q” deb aytgan.
Xabar qilinishicha, Alla Pugachyova Rossiyaga Maksim Galkinsiz kelgan.
Izoh (0)