“U haqida”, “Daydi”, “Layli” qo‘shiqlari bilan tanilgan xonanda Dilnoz 18-19-sentyabr kunlari “Xalqlar do‘stligi” san’at saroyida olti yillik ijodi davomidagi eng sara qo‘shiqlari bilan ilk yakkaxon konsert dasturini taqdim etdi. Dilnozning “Saharlarda” nomli konserti qanday o‘tgani haqida “Daryo” maxsus videoreportaj tayyorladi.
Ikki kun davom etgan tadbirga o‘zbek estradasining yorqin vakillari, xonandaning yaqinlari va to‘rt mingdan ortiq tomoshabin tashrif buyurib, Dilnoz bilan baravariga qo‘shiq kuylab, uni qo‘llab-quvvatladi.
Konsert davomida xonanda o‘zining eng mashhur va sara qo‘shiqlarini ijro etdi, “Alla”, “Musofir onam” kabi ta’sirchan kompozitsiyalari tomoshabinlar qalbini zabt etdi. Dilnoz Hakimova sahnada muxlislar bilan samimiy muloqotda bo‘lib, ularning e’tiborini qozondi.
Reper Konsta, Shohruxxon, Mirjalol Ne’matov bilan kuylangan duetlar sahnani “portlatdi”. Dilnoz bolaligidan buyon Shohruxxonning ashaddiy muxlisi ekani va duetga rozilik olgandagi hayajoni haqida samimiy so‘zlab berdi. Onasi sobiq mayor bo‘lgani, e’tibor markazida bo‘lishni istamaydigan ayol ekani, konsertda old o‘rindiqda o‘tirishga ham bir amallab ko‘ndirgani haqida gapirib, volidasini guldastalar bilan xursand qildi.
— Konsert ko‘tarinki kayfiyatda o‘tdi, ko‘nglingiz to‘ldimi?
— Ko‘nglim ortig‘i bilan to‘ldi. To‘g‘ri, birinchi kunda hayajonlandim, lekin texnik xatolar bo‘lmagandi. Bugun ba’zi bir narsalar yodimdan chiqdi, shunga qaramay muxlislarim bilan dildan samimiy suhbatlashdim.
— Ko‘pchilik san’atkorlar konsert oldi qora piar qiladi, lekin sizda bu holat kuzatilmadi. Umuman olganda, shunday takliflar bo‘ldimi?
— Bo‘ldi, albatta, lekin men ham, jamoam ham buni xohlamadik. Bir ovozdan rad qildik. Xudoga shukr, biletlar hammasi sotildi, hech qanday piarga muhtoj bo‘lmadim.
— Duetlar taklifi kimdan chiqdi?
— Mirjalol menga taklif qildi, menga qo‘shiq juda yoqdi. Shohruxxonga esa o‘zim taklif bilan chiqdim, u kishi rad etmay o‘zlari qo‘shiq yozdilar.
— Siz bilan ijodini deyarli bir vaqtda boshlagan hamkasblaringiz olti oy ichida yana konsert bermoqchi. Sizda kelajakdagi reja, maqsadlar qanday?
— Eng katta orzumga erishdim — yakkaxon konsertimni berdim. Buyog‘iga maqsad oila, undan keyin yana ijod. Qachon konsertim bo‘lsa, shundan keyin to‘yim bo‘lishi kerak edi. Shuning uchun mana konsert berdim, navbat to‘yga.
— “Daydi” yoringiz qo‘llab-quvvatlashga keldimi?
— Albatta, keldi. Boshqa qayerda bo‘lishi mumkin (kulib).
Konsert yakunida “Oramizda daydilar bormi? Daydisi borlar-chi?” deya muxlislari bilan birgalikda eng mashhur taronasi “Daydi”ni kuyladi.
Videoni to‘liq holda Daryo Lifestyle kanalida tomosha qiling.
Izoh (0)