Rossiyalik taniqli xonanda, Ukrainadagi “maxsus operatsiya”ni ochiqchasiga tanqid qilib kelayotgan Alla Pugachyovaning nevarasi Nikita Presnyakov safarbar qilindi, deya xabar bermoqda “5-tv.ru” o‘z manbalariga tayanib.
U Moskvaning Gubernskiy teatrida repetitsiya chog‘ida harbiy komissariatga olib ketilgan.
Keyinroq Moskva Gubernskiy teatri qo‘shiqchining safarbar etilgani haqidagi xabarlarni rad etdi.
“Nikita Presnyakov ushbu teatrda taklif etilgan artist sifatida faoliyat yuritadi, u shtatda mavjud emas va faqat spektakl bo‘ladigan kunda repetitsiyalarga keladi. Uning ishtirokidagi bundan avvalgi spektakl 21-sentabrda bo‘lib o‘tgandi. Shuning uchun bularning barchasi haqiqatga to‘g‘ri kelmaydi”, — deyiladi teatr matbuot xizmati xabarida.
Nikita Presnyakov 31 yoshda, u Rossiyada xizmat ko‘rsatgan artist Kristina Orbakayte va qo‘shiqchi Vladimir Presnyakovning o‘g‘li. Uning buvisi — SSSR xalq artisti Alla Pugachyova. U 29-sentabr kuni kenja farzandlari bilan birga xususiy samolyotda Rossiyani tark etgandi.
Keyinroq u Isroil pasportini olgani, Rossiyadagi qasrini esa sotuvga qo‘ygani xabar berildi. Shuningdek, uning qo‘shiqlari radioto‘lqinlardan olib tashlandi.
20-sentabr kuni kuni xonandaning ustidan shikoyat tushgandi. Bunga sabab esa Pugachyova Rossiya Adliya vazirligidan eri Maksim Galkin va o‘zini “xorijiy agent” deb e’lon qilishni so‘ragan. U o‘z Instagram’ida erini “Rossiyaning haqiqiy vatanparvari” deb atab, “tinch hayot, so‘z erkinligi” va “yigitlarning xayoliy maqsadlar yo‘lidagi o‘limiga chek qo‘yilishini” tilagan edi.
Rossiya Ukrainaga bostirib kirgach, bir qator san’atkorlar urushga qarshi chiqdi, ularning ayrimlari Rossiyani tark etdi. Urush va Putinni tanqid qilgan artistlar deyarli darhol konsertlari bekor qilinishi holatiga duch keldi. Ularning bir qatori esa “xorijiy agentlar” ro‘yxatiga kiritildi.
Maksim Galkin san’atkorlar orasida birinchilardan bo‘lib Ukrainadagi vaziyat bo‘yicha o‘z fikrlarini bildirgan. U televideniyeda “maxsus operatsiya” to‘g‘risida yangiliklar haddan tashqari ko‘payib ketganini aytgan. Bundan tashqari, Rossiya telekanallaridagi senzura hamda prezident Vladimir Putin siyosatini tanqid qilgan. Bundan g‘azabga kelgan ayrim odamlar uni vatan xoiniga chiqargan va Galkinning Arxangelsk shahrida o‘tishi rejalashtirilayotgan konserti bekor qilingan.
Oxir-oqibat Alla Pugachyova hamda Maksim Galkin egizak farzandlarini olib, Isroilga jo‘nab ketgandi. Avgust oxirida esa Pugachyovaning o‘zi farzandlari bilan Rossiyaga qaytib keldi.
Sentabr boshida Rossiya prezidenti matbuot kotibi Dmitriy Peskov birinchi marta Putinni va Ukrainadagi urushni tanqid qiluvchi san’atkorlarga munosabat bildirib, Pugachyovaga prezident “juda yaxshi” munosabatda ekanini aytgandi. “Ular bir-birini biladi, ular tanish, bir necha marta uchrashishgan”, — dedi Peskov.
Izoh (0)