Yangi Toshkent shahri qurilishi uchun Toshkent viloyatidan yana 122,3 gektar yer ajratildi.
Viloyat hokimining 14-martdagi tegishli qarori bilan Yuqori Chirchiq tumanidagi “Bordonko‘l” hududidan 75,22 gektar, “Do‘stlik” hududidan esa 47,1 gektar yer “Yangi Toshkent shahrini barpo etish direksiyasi”ga doimiy foydalanish huquqi bilan ajratib berildi.
2024-yilning oktyabrida Yuqori Chirchiq tumanidan davlat zaxirasiga qaytarilgan hamda toifasi o‘zgartirilgan 110,4 gektar yer maydoni doimiy foydalanish huquqi bilan “Yangi Toshkent shahrini barpo etish direksiyasi”ga ajratib berilgandi. Tumanning “O‘zbekiston”, “Guliston”, “Istiqlol” mahallalaridagi hududlar Yangi Toshkent shahri hududiga o‘tkazilgandi.
Viloyat hokimligi matbuot xizmatining bildirishicha, shu kunga qadar jami 2 200 gektardan ortiq yer maydonlari “Yangi Toshkent shahrini barpo etish direksiyasi”ga doimiy foydalanish huquqi bilan berilgan.
Yangi Toshkent shahrining qurilishi
2023-yilning mart oyida Yangi Toshkent shahrining qurilishiga tamal toshi qo‘yilgan edi. 2024-yil aprelida bu yerda ilk inshootlar qurilishini boshlash marosimi bo‘ldi.
2023-yilning iyulida “Yangi Toshkent shahrini barpo etish chora-tadbirlari to‘g‘risida”gi prezident qarori qabul qilingan. 500 ming aholiga mo‘ljallangan Yangi Toshkent shahri Chirchiq va Qorasuv daryolari oralig‘ida barpo etiladi. Yangi Toshkent loyihasini amalga oshirish uchun tanlab olingan hudud — dengiz sathidan 500 metr baland bo‘lib, shaharga yaqinligi, o‘z iqlimi, bahavoligi va ikki daryo o‘rtasida joylashgani bilan noyob hisoblanadi.
Davlat rahbari 2023-yil sentyabrida Yangi Toshkent shahrining bosh rejasi loyihasi bilan tanishganida Yangi Toshkent “aqlli” va “bog‘ shahar” bo‘lishini aytgandi. Davlat idoralari bosqichma-bosqich Yangi Toshkentga ko‘chib boradi.
2024-yilning dekabrida prezident Yangi Toshkent shahridagi infratuzilma qurilishi va ilk loyihalarni ko‘zdan kechirdi. Shaharda zamonaviy urbanizatsiya talablari asosida “aqlli” texnologiyalar qo‘llanadi. Mehmonxona va restoranlar, o‘ziga xos dizayndagi muhtasham binolar tashrif buyuruvchilarga yuqori sifatli xizmat ko‘rsatishi bilan birga shaharni turizm markaziga aylantiradi.
Izoh (0)