“Yangi Toshkent shahrini barpo etish chora-tadbirlari to‘g‘risida”gi prezident qarori qabul qilingandi. Qarorga ko‘ra, Yang Toshkent shahrining bosh rejasi loyihasini tezkor va sifatli ishlab chiqish maqsadida bir necha xorijiy kompaniyalar jalb etildi.
Bular Singapurning Meinhardt Pte. Ltd. Buyuk Britaniyaning Foster and partner va Gollandiyaning ОМА kompaniyalari bo‘lib, amaliy ishlar boshlab yuborilgan.
Qarorga ko‘ra, Vazirlar Mahkamasi huzurida davlat muassasasi shaklida Yangi Toshkent shahrini barpo etish direksiyasi tashkil etilishi belgilangandi.
Ushbu direksiyaning vazifalari qatoridan quyidagilar o‘rin olgan:
- rivojlangan mamlakatlarda muvaffaqiyatli sinovdan o‘tgan amaliyotlar asosida hamda yetakchi xorijiy va mahalliy loyiha tashkilotlarini jalb qilgan holda Yangi Toshkent shahri hududini rivojlantirish rejalarini, tarmoq rejalarini va manzilli dasturlarini ishlab chiqish hamda tasdiqlash;
- loyihalarni amalga oshirish bo‘yicha investorlar bilan muzokaralar olib borish, salohiyatli investorlarni tanlash;
- Loyiha-qidiruv va qurilish montaj ishlarini amalga oshirish bo‘yicha alohida texnik shartlarga amal qilish to‘g‘risida bitimlar tuzish va ularning ijrosi ustidan monitoring olib borish;
- Yangi Toshkent shahri hududidagi ijtimoiy soha obyektlari, shuningdek, muhandislik-kommunikatsiya tarmoqlari, yo‘l-transport infratuzilmalarini barpo etishda buyurtmachi funksiyasini bajarish;
- zamonaviy uy-joylash qurish ishlariga katta tajribaga ega bo‘lgan mahalliy va xorijiy kompaniyalarni jalb qilish, ularga zamonaviy uslublar, energiya tejamkor texnologiyalar va qurilish materiallarini qo‘llash yuzasidan ko‘rsatmalar berish.
2027-yil 1-yanvargacha direksiya, investorlar, bosh loyiha va bosh pudrat tashkilotlari O‘zbekistonda ishlab chiqarilmaydigan, chetdan olib kelinadigan qurilish texnikasi, asbob-uskuna, butlovchi buyumlar, ehtiyot qismlar uchun bojxona boji to‘lashdan ozod qilinadi.
500 ming aholiga mo‘ljallangan Yangi Toshkent shahri Chirchiq va Qorasuv daryolari oralig‘ida barpo etiladi. 18-mart kuni Shavkat Mirziyoyev “Yangi Toshkent” loyihasi qurilishiga tamal toshini qo‘ygandi.
Izoh (0)