Yangi Toshkentda 420 gektar maydonda Markaziy bog‘ barpo etiladi

Shavkat Mirziyoyev “Yangi Toshkent” loyihasi qurilishiga tamal toshi qo‘yish marosimida nutq so‘zlayotgani to‘g‘risida xabar berilgandi. “Daryo” muxbirining ma’lum qilishicha, prezident poytaxt aholi uchun har tomonlama qulay sharoitga ega, chinakam ekologik shahar bo‘lishi kerakligiga eʼtibor qaratgan.

Shu maqsadda “Toshkentning yashil belbog‘i” loyihasi aynan Yangi Toshkent hududidan boshlanadi. Bunda 420 gektar maydonda Markaziy bog‘ barpo etilib, 200 ming tup daraxt ekiladi. Bugun ushbu bog‘da yaxshi niyatlar bilan 1 ming tup daraxt ekiladi.

Davlati rahbari bu ishlarning davomi sifatida “Yashil makon” umummilliy loyihasi doirasida bahor faslida har bir mahalla hududida 1 mingtadan daraxt ekishni taklif etgan.

So‘zining yakunida prezident Toshkent Yangi O‘zbekistonning yuksak taraqqiyot darajasi va salohiyatiga har tomonlama mos bo‘lgan yirik megapolisga, dunyodagi eng go‘zal va jozibador shaharlardan biriga aylanishiga ishonch bildirgan.

Toshkent viloyatining chegaradosh tumanlari hisobidan poytaxt hududi bosqichma-bosqich kengaytirilib, Chirchiq va Qorasuv daryolari oralig‘ida “Yangi Toshkent” loyihasini amalga oshiriladi. Yangi Toshkent loyihasini amalga oshirish uchun tanlab olingan hudud — dengiz sathidan 500 metr baland bo‘lib, shaharga yaqinligi, o‘z iqlimi, bahavoligi va ikki daryo o‘rtasida joylashgani bilan noyob hisoblanadi.