Toshkent shahar hokimining “Yangi Toshkent” loyihasini inobatga olgan holda poytaxtning yangi bosh rejasini ishlab chiqish to‘g‘risidagi qarori qabul qilindi.
Bunda, Toshkent shahrining yangi bosh rejasini ishlab chiqishda poytaxt hokimligi buyurtmachi funksiyasini bajaradi. Buyurtmachiga Toshkent shahrining yangi bosh rejasini “Yangi Toshkent” loyihasini inobatga olgan holda loyihaoldi hujjatlarni tayyorlash hamda xorijiy loyiha tashkilotini belgilash uchun xalqaro tanlovga olib chiqishga qadar bo‘lgan tadbirlarni amalga oshirishda “ToshkentboshplanLITI” DUK bilan to‘g‘ridan to‘g‘ri shartnoma tuzishga ruxsat berilgan.
Buyurtmachi va “ToshkentboshplanLITI” DUK o‘rtasida rasmiylashtiriladigan shartnoma doirasida, birinchi bosqichda Toshkent shahar mahalliy budjetining qo‘shimcha manbalari hisobidan 40 milliard so‘m ajratiladi.
Yangi bosh rejani amalga oshirish bo‘yicha buyurtmachi etib “Yagona buyurtmachi xizmati” injiniring kompaniyasi belgilandi.
Bosh rejani tayyorlash muddati bir necha bor qoldirilgan edi
2012-yil yozida Toshkent shahri va uning atrofi bosh rejasining 2030-yilgacha hisoblangan texnik-iqtisodiy asoslari muhokama qilingani haqida xabar berilgan. 2018-yilning avgustidagi prezident farmonida poytaxtning tasdiqlangan bosh rejasi mavjud emasligi “tartibsiz qurilishlarga olib kelmoqda, tadbirkorlik subyektlari faoliyatini yanada kengaytirishga imkon bermayapti, shuningdek, poytaxtni faol ijtimoiy-iqtisodiy rivojlantirishga to‘sqinlik qilmoqda”, — deya qayd etilgan edi.
Shahar hokimiga 2018-yil 1-oktabrga qadar bosh reja konsepsiyasining loyihasi hamda bosh rejaning o‘zini ishlab chiqish bo‘yicha xalqaro tanlov o‘tkazish topshirilgan.
2019-yilning fevral oyida poytaxt hokimining arxitektura, kapital qurilish va kommunikatsiyalarni rivojlantirish masalalari bo‘yicha sobiq birinchi o‘rinbosari Davron Hidoyatov (hozirgi Chirchiq shahar hokimi) Toshkent shahrining bosh rejasi konsepsiyasi o‘sha yilning apreliga qadar 3D formatda tayyorlanishi haqida ma’lum qilgandi. Shuningdek, u loyihani yaratish ustida Xitoy, Turkiya va Buyuk Britaniya kompaniyalari ish olib borayotganini qayd etgan edi.
Keyinchalik belgilangan muddatlar ortga surildi — ishlab chiqishda turk kompaniyasi ishtirok etgan hujjat 2020-yilda taqdim etilishi rejalashtirilayotgani ma’lum qilindi.
Qurilish vazirining sobiq birinchi o‘rinbosari Sherzod Xidoyatov (hozirgi qurilish va uy-joy kommunal xo‘jaligi vazirining birinchi o‘rinbosari) 2020-yil dekabr oyida Toshkentning bosh rejasini ishlab chiqish 2022-yil oxirigacha yakunlanib, aholiga taqdim etilishi rejalashtirilganini ma’lum qildi. Ushbu muddat hukumat tomonidan tasdiqlangan muddatga mos keladi.
Prezidentning 2020-yil noyabrdagi qarori bilan 2025-yilgacha O‘zbekistonning barcha shaharlari va shahar posyolkalarining to‘rtdan bir qismini bosh rejalar bilan qamrab olish belgilangan. Bunda loyiha hujjatlari jamoatchilik muhokamasi natijalarini hisobga olgan holda tasdiqlanishi lozim edi.
Shavkat Mirziyoyev 2022-yil 18-oktabr kuni “ToshkentboshplanLITI” davlat unitar korxonasiga borib, Toshkent shahrining 2045-yilgacha bo‘lgan Bosh rejasi loyihasi bilan tanishgandi. O‘shanda Toshkent shahrining 2045-yilgacha bo‘lgan bosh rejasi loyihasi “Yangi Toshkent” konsepsiyasi bilan mutanosib tayyorlangani aytilgan. Bu yangi shahar poytaxtning sharqiy qismida, Chirchiq va Qorasuv daryolari oralig‘ida barpo etiladi. 500 ming aholiga mo‘ljallangan bo‘ladi.
2023-yil 16-yanvar kuni prezident Toshkent shahar hokimi Jahongir Ortiqxo‘jayevni ishdan olgandi. Yig‘ilishda davlat rahbari poytaxtning Bosh rejasi haligacha tasdiqlanmagani natijasida ruxsatsiz qurilgan obyektlar soni 250 dan oshib ketgani, qurilishga ruxsat berilganda, mavjud infratuzilmaga yuklama bo‘yicha aniq hisob-kitob qilinmayotgani, bozorlarda oziq-ovqat muzlab qolmasligi uchun, narx-navo oshib ketmasligi uchun chora ko‘rilmayotgani uchun poytaxt mutasaddilariga qat’iy e’tiroz bildirilgan edi.
Izoh (0)