Saudiya Arabistonining bir qancha klubi vakillari “Real” hujumchisi Vinisius Juniorni o‘z safiga qo‘shib olish rejasidan qaytmagan. The Telegraph nashrining xabariga ko‘ra, braziliyalik futbolchi Saudiya jamoalari uchun asosiy transfer maqsadlaridan biri bo‘lib turibdi va muzokaralar allaqachon boshlangan.
Vinisius Saudiya Arabistoni suveren jamg‘armasi tomonidan boshqariladigan klublardan biriga o‘tishi mumkin. Bular “Al-Hilol, “Al-Ahli”, “An-Nassr” va “Al-Ittihod” jamoalari hisoblanadi. Uning transferi taxminan 242 million yevroga baholanmoqda. Agar kelishuv amalga oshsa, bu futbol tarixidagi eng qimmat transferga aylanadi. Hozirgi rekord Neymarga tegishli bo‘lib, u 2017-yilda “Barselona”dan “PSJ” ga 222 million yevroga transfer qilingan edi.
Madrid klubi Vinisiusni qo‘yib yuborishni istamayapti, lekin futbolchining o‘zi rozilik bersa, bitim amalga oshishi mumkin. Sababi “Real” rahbariyati braziliyalik yulduzning narxi vaqt o‘tishi bilan pasayib borishini tushunib turibdi. Uning “qaymoqranglilar” bilan tuzilgan shartnomasi 2027-yilning yozigacha mo‘ljallangan.
Ma’lumot o‘rnida Vinisius joriy mavsum barcha musobaqalar doirasida 29 ta uchrashuvda maydonga tushib, 16 marta raqiblar darvozasini ishg‘ol qilgan hamda 8 bor assist muallifiga aylangan.
