Мадриднинг “Реал” клуби вингери Винисиус Жуниор илк бор жамоа сардори сифатида майдонга тушганидан кейин ўз фикрлари билан ўртоқлашди. У Испания Кубоги ярим финал босқичи доирасидаги “Реал Сосьедад”га қарши ўйинда (0:1) сардорлик боғичи билан ҳаракат қилди.
Мен “Реал” тарихига кириб, бу клуб сафида 500 та ўйин ўтказишни истайман. 24 ёшимда дунёнинг энг яхши жамоаси сардори бўлиш – тасвирлаб бўлмас туйғу, дея Винисиус Жуниорнинг сўзларини келтиради инсайдер Фабрицио Романо.
Аввалроқ матбуотда Саудия Арабистони клубларининг 24 ёшли футболчига бўлган қизиқиши ҳақида хабарлар тарқалган эди. Бир қанча клублар Винисиусни қўлга киритиш учун унинг 1 миллиард евролик товон пулини тўлашга тайёр экани айтилмоқда.
Маълумот учун, ҳозирги вақтгача бразилиялик ҳужумчи “Реал” сафида 299 та ўйин ўтказган. Клуб рекордчиси эса Рауль Гонсалес ҳисобланади. У 1994–2010 йиллар оралиғида “қаймоқранглилар” сафида 741 та расмий ўйин ўтказган.
“Реал” сафида энг кўп ўйин ўтказган 5 ўйинчи:
- Рауль Гонсалес — 741 ўйин
- Икер Касиляс — 725 ўйин
- Серхио Рамос — 671 ўйин
- Мануэл Санчес — 710 ўйин
- Карим Бензема — 648 ўйин
“Реал” клуби Ла Лига доирасидаги кейинги учрашувни эртага, 1 март куни “Бетис”га қарши ўтказади. Жамоа 25 турдан сўнг 54 очко тўплаган ҳолда “Барселона” билан турнир жадвалида пешқадамликни бўлишиб турибди.
Изоҳ (0)