“Manchester Siti” rahbariyati bir necha oydan beri tarkibda katta o‘zgarishlar qilishga tayyorgarlik ko‘rmoqda. Bu haqida Sky Sports nashriga tayanib Ua-football xabar bermoqda.
Bu jarayon Pep Gvardiolaga jamoani qayta shakllantirish hamda chempionlik uchun asosiy da’vogarlar qatoriga qaytarish imkoniyatini beradi.
Manbaga ko‘ra, klub o‘z vaqtida yuqori sport formasida bo‘lgan va kelajakda bu darajasiga qayta chiqolmaydigan futbolchilardan xalos bo‘lishni rejalashtirmoqda. Klub rahbariyati allaqachon ushbu futbolchilarga yangi jamoa topish zarurligi haqida xabar bergan.
“Siti”ni tark etishi kutilayotgan futbolchilar orasida Jek Grilish, Kevin De Bryuyne, Bernardu Silva, Jon Stouns, Mateo Kovachich, Ilkay Gyundogan hamda darvozabon Ederson bor. Ma’lum bo‘lishicha, ushbu futbolchilar yozgi transfer oynasi ochilishi bilan jamoani tark etadi.
Shu bilan birga, “Manchester Siti” tarkibni kuchaytirish maqsadida yangi futbolchilar bilan muzokaralar olib bormoqda. Himoyani mustahkamlash uchun asosiy nomzod “Yuventus” futbolchisi Andrea Kambyaso bo‘lib turibdi.
Shuningdek, joriy mavsum A Seriyaning eng yaxshi markaziy yarim himoyachilaridan biri hisoblangan Samuele Richchi hamda markaziy himoyachi Usmon Diomandi bilan muzokaralar davom etmoqda. Klub, shuningdek, Kevin De Bryuyne o‘rniga “Bayer” futbolchisi Florian Virtsni tarkibga qo‘shishni rejalashtirmoqda.
Eslatib o‘tamiz, 26-turdan so‘ng “Manchester Siti” 44 ochko bilan Angliya chempionati turnir jadvalida 4-o‘rinda bormoqda.
Izoh (0)