Чехиянинг Градец-Кралов шаҳридаги савдо марказида содир этилган пичоқбозлик оқибатида икки аёл ҳалок бўлди. Бу ҳақда маҳаллий ҳокимиятга таяниб Euronews хабар берди.
Гумонланувчи 16 ёшли ўсмир. У воқеадан ўн дақиқа ўтиб қўлга олинган.
Полиция маълумотларига кўра, иккала қурбон ҳам ҳужум содир бўлган дўконда ишлаган.
Биз тахминан ҳодисадан 10 дақиқа ўтиб, жиноят содир этилган жойдан бир километрдан камроқ масофада гумонланувчига етиб олдик. У махсус кучлар гуруҳи томонидан жиноят жойида қўлга олинди, деди шаҳар ҳудудий полицияси матбуот котиби Ива Кормосова.
Чехия бош вазири Петр Фиала ҳалок бўлганларнинг яқинларига ҳамдардлик билдирди.
Бугун Градец-Краловода содир бўлган воқеа мутлақо тушунарсиз ва даҳшатли ҳаракатдир, деб ёзди у Х ижтимоий тармоғида.
Ҳужум сабаби ҳозирча номаълум, тергов давом этмоқда. Полициянинг таъкидлашича, вазият назорат остида ва энди жамоатчилик учун хавф туғдирмайди.
Аввалроқ Австриянинг жанубидаги Филлах шаҳрининг марказий майдонида суриялик эркак пичоқ билан ўткинчиларга ҳужум қилгани ҳақида хабар берилган эди.
Ҳужум оқибатида 14 ёшли ўсмир ҳалок бўлган ва яна беш киши жароҳат олган, улардан икки нафари оғир аҳволда экани айтилган эди. Жиноятчини қўлга олишда яқин атрофда бўлган суриялик курер муҳим рол ўйнаган. У янги қурбонларнинг олдини олиш учун ҳужум қилган эркакни атайлаб машинасида уриб юборган. Шундан сўнг ҳужум қилган 23 ёшли шахс қўлга олинган. У Австрияга Суриядан келган ва сиёсий бошпана излаган. Унинг амалдаги яшаш рухсатномаси бўлган. Ҳужум сабаблари ҳақида маълумот берилмаган. Терговга экстремизмга қарши курашиш бўйича полиция бўлинмаси жалб қилинган.
Изоҳ (0)