O‘zbekiston futbol assotsiatsiyasi ustaviga muvofiq, 22-fevral kuni O‘FA prezidentligiga saylov bo‘lib o‘tadi. Bu haqda O‘FA xabar berdi.
Foto: “Daryo” / Madina Nurman
20-yanvar kuni O‘FA tomonidan o‘z aʼzolariga ushbu lavozimga nomzodlar bo‘yicha o‘z takliflarini yuborishlarini so‘rab murojaat qilingan. O‘FA rasmiy elektron pochtasiga kelib tushgan nomzodlar to‘g‘risidagi maʼlumotlar O‘FA Saylov qo‘mitasi tomonidan O‘zbekiston futbol assotsiatsiyasi Ustavi va Saylov kodeksiga muvofiq tekshirilib, O‘FA Ustavining 30-moddasiga asosan, Kongressdan 30 kun oldin O‘FA Kotibiyatiga taqdim etildi.
O‘FA Ustavining 33-moddasiga ko‘ra, O‘FA aʼzolari navbatdan tashqari saylov Kongressining o‘tkazilish joyi va kun tartibi to‘g‘risida Kongress o‘tkazilishidan kamida 10 kun oldin xabardor qilinishi lozim. Shu munosabat bilan, Kongressning o‘tkazilish joyi va kun tartibi 12-fevral kuni barcha aʼzolarga yetkazilishi belgilangan.
Shuningdek, O‘FA Saylov kodeksining 11-moddasida nomzodlarning rasmiy ro‘yxati to‘g‘risidagi maʼlumotlar matbuotda ham eʼlon qilinishi zarurligi keltirilgan bo‘lib, O‘FA aʼzolari tomonidan O‘zbekiston futbol assotsiatsiyasi prezidenti lavozimiga Bahodir Qurbonov nomzodi ilgari surildi.
Yuqoridagilardan kelib chiqib, O‘zbekiston futbol assotsiatsiyasi navbatdan tashqari saylov Kongressi 2025-yilning 22-fevral kuni O‘FA binosida bo‘lib o‘tishi maʼlum qilinadi.
Izoh (0)