Болливудда баъзи севги ҳикоялари эртакдек бошланган бўлса-да, кутилмаганда якун топган. Айрим машҳурлар ҳатто унаштирилган, бироқ турмуш қуриш насиб этмаган. Бугунги мақолада шов-шувли муносабатлари тўйгача етиб бормаган ҳинд киносининг юлдузли жуфтликлари ҳақида сўз боради.
Абҳишек Баччан ва Каришма Капур
Болливуднинг энг бадавлат оилаларидан чиққан бу икки санъаткор 2002 йилда унаштирилгунга қадар узоқ вақт — 5 йил давомида учрашиб юрган. Унаштирув 2002 йил октябрь ойида, Амитабҳ Баччаннинг туғилган кунида бўлиб ўтган. Аммо уларнинг бахтиёр муносабатлари узоққа чўзилмади ва 2003 йил февраль ойида уларнинг фотиҳаси бузилди. Баъзи хабарларда Каришманинг онаси Бабитанинг бунга сабабчи бўлганлиги айтилса, бошқа манбаларда Каришма турмуш қурганидан кейин Баччанлар оиласи томонидан фильмларда рол ўйнашига рухсат берилмаган, дейилди.
Бироқ Абҳишек ва Каришманинг ажралиш сабаби ошкор этилмади ва иккала оила бу масалада сукут сақлашни лозим топди. Маълум вақтдан сўнг Каришма Санжай Капурга турмушга чиқди, лекин улар ажрашиб кетди. Ҳозирда актриса икки фарзанднинг ёлғиз онаси, Абҳишек эса Айшвария Райга уйланган ва уларнинг Аарадҳа исмли қизи бор.
Салмон Хон ва Сангита Бижлани
Салмон Хон ва Сангита Бижлани 1980 йилларнинг охири ва 1990 йилларнинг бошларида Болливуднинг энг кўп муҳокама қилинган жуфтликларидан бири бўлган. Уларнинг муносабатлари жуда жиддий бўлиб, ҳатто 1994 йил 27 май санасига белгиланган тўй учун таклифномалар ҳам босмадан чиқарилган эди. Аммо тўй олдидан номаълум сабабларга кўра улар ажралишди. Кейинчалик Сангита Бижлани крикет ўйинчиси Муҳаммад Ааруддинга турмушга чиқди, аммо улар 2010 йилда ажрашишди.
Кўп йиллар ўтиб, турли манбаларда ажралишга сабаб сифатида Салмон Хоннинг беқарор хулқ-атвори ва содиқлик масалалари кўрсатилган. Бироқ, ажралишларига қарамай, Салмон ва Сангита яхши дўст бўлиб қолишди. Ҳозирда ҳам улар бир-бирига ҳурмат билан муносабатда бўлиб, турли тадбирларда учрашиб туришади.
Акшай Кумар ва Равина Тандон
Акшай Кумар ва Равина Тандон 1990 йилларда Болливуднинг энг машҳур жуфтликларидан бири бўлган. Уларнинг муҳаббати “Пиёда” (1994) фильми суратга олиш жараёнида бошланган ва тез орада жиддий муносабатга айланган. Равинанинг айтишича, улар ҳатто махфий тарзда унаштирилган ва Акшай унга турмуш қуришга ваъда берган.
Аммо вақт ўтиши билан Акшайнинг бошқа актрисалар билан яқинлиги, хусусан, Шилпа Шетти билан муносабатлари сабабли жуфтлик ўртасида келишмовчиликлар юзага келган. Равина бу ҳолатларга чидай олмаган ва 1990 йилларнинг охирида улар ажралишган. Сўнг Равина Анил Тадани билан турмуш қурди, Акшай эса Твинкл Ханна билан оила қуриб, бахтли ҳаёт кечирмоқда.
Каришма Танна ва Упен Пател
Каришма Танна ва Упен Пателнинг муҳаббати "Бигг Босс” реалити-шоусида бошланган. Улар кўрсатувда танишиб, тез орада жуфтлик эканлигини эълон қилган. Ўша вақтда томошабинлар Каришма ва Упенни мукаммал жуфтлик деб атаган. Упен 2015 йилда Каришмага совчи қўйиб, шоунинг ўзида унга турмуш қуриш таклифини билдирган:
Аммо 2016 йилда улар ажралишгани ҳақида эълон қилишди. Бунинг сабабини аниқ ошкор қилишмаган бўлса-да, Упен муносабатларда баъзи муаммолар бўлганини тан олган. Бугунги кунга келиб, ҳар иккиси ўз ҳаёт йўлини танлаб, шахсий карьерасини қуриш билан банд.
Вивек Оберой ва Гурприт Гилл
Вивек Оберой ва Гурприт Гилл бир вақтлар жиддий муносабатда бўлган ва ҳатто унаштирилган эди. Уларнинг муҳаббати Болливудда машҳур бўлишдан аввал бошланган бўлиб, Вивек ҳали актёр сифатида танилмаган эди.
Аммо Вивекнинг актёрлик карьераси ривожланиб, ҳинд киноси юлдузига айланганидан сўнг, уларнинг муносабатлари ўзгариб кетган. Иш жадвали зичлиги ва дунёқарашларнинг ўзгариб кетиши сабабли Вивек ва Гурприт ўртасида келишмовчиликлар юзага келган ва охир-оқибат улар ажралишган. Шундан сўнг Гурприт Болливуд оламидан узоқроқ бўлишни танлаган, Вивек эса 2010 йилда Приянка Алва билан турмуш қурди ва ҳозирда оиласи билан бахтли ҳаёт кечирмоқда.
Изоҳ (0)