Bollivudning taniqli aktyori Saif Ali Xon 16-yanvarga o‘tar kechasi o‘z uyida bosqinchi tomonidan pichoqlangandan so‘ng, jiddiy operatsiyani boshidan o‘tkazdi. Hozirda aktyor xavfdan xoli. Bu haqda BBC nashri xabar berdi.
Aktyorga bo‘lgan hujum Hindistonning Mumbay shahrida, Xon oilasi yashaydigan xonadonda sodir bo‘lgan. Shahar politsiyasi maʼlum qilishicha, aktyor yarim kechasi uning uyiga kirgan nomaʼlum shaxs bilan to‘qnashuv natijasida yaralangan. O‘g‘rilikka kirgan, deb taxmin qilinayotgan bosqinchi aktyorning bo‘yin va umurtqa pog‘onasi qismiga 6 marta pichoq sanchigan. Politsiya ushbu hodisani tekshirish uchun maxsus guruhlar tuzdi.
“Saif Ali Xon operatsiyadan muvaffaqiyatli o‘tdi va hozirda uning hayoti xavfdan xoli. U sog‘ayish jarayonida, shifokorlar uning ahvolini kuzatib bormoqda”, deyiladi Xon jamoasining bayonotida.
Operatsiyadan so‘ng jurnalistlar oldida so‘zga chiqqan Lilavati shifoxonasi shifokori Nitin Dange, aktyor “umurtqa pog‘onasiga sanchilgan pichoq tufayli orqa miyaning ko‘krak qismida jiddiy jarohat olganini” aytdi.
“Pichoqni olib tashlash va orqa miya suyuqligi oqishini to‘xtatish uchun operatsiya o‘tkazildi. Uning chap qo‘lidagi va bo‘ynidagi yana ikkita chuqur jarohat plastik jarrohlar guruhi tomonidan davolandi”, dedi u.
Hujum haqida to‘liq tafsilotlar hali nomaʼlum.
Saif Ali Xon Bollivudning yana bir taniqli yulduzi — Karina Kapur bilan turmush qurgan. Ularning ikki nafar farzandi bor. Karina Kapur o‘zining Instagram sahifasidagi storisda “bu hodisa oilamiz uchun juda qiyin kun” bo‘lganini aytdi.
Aktrisa barcha OAV va paparatssilardan mavzuni yoritishda turli taxminlardan tiyilishni va oilasining shaxsiy chegaralarni hurmat qilishlarini so‘radi.
“Biz haqimizda tashvishlanganingiz va qo‘llab-quvvatlaganingizni qadrlaymiz, ammo doimiy nazorat va e’tibor ostida bo‘lish bizning xavfsizligimiz uchun jiddiy xavf tug‘dirishi mumkin”, deya qo‘shimcha qildi u.
Saif Ali Xon haqida
Aktyor 1993-yilda Bollivudda ilk bor hind kinosiga qadam qo‘ygan. U faoliyati davomida 60 dan ortiq filmlarda, jumladan, Uilyam Shekspirning “Otello” asariga moslashtirilgan “Omkara” filmi, “Muqaddas o‘yinlar” serialida suratga tushgan. U “Muhabbat kecha va bugun” melodramasi, “Agent Vinod” trilleri va “Goaga borib kelamiz” komediyasiga prodyuserlik qilgan. Raj Kapurning nevarasi Karina Kapur bilan oila qurganiga 10 yildan oshdi. Birinchi turmushidan aktyorning ikki farzandi bor — qizi Sara Ali Xon, u ham aktrisa va o‘g‘li Ibrohim Ali Xon — Bollivudda debyut qilish arafasida. Ikkinchi nikohidan esa ikki o‘g‘li — Taymur va Jeh ismli bolalar voyaga yetmoqda.
Izoh (0)