Turkiyalik aktrisa va model Melisa Asli Pamuk onalik baxtiga erishdi — joriy yil 29-yanvar kuni u o‘g‘il farzandli bo‘ldi. Bu haqda aktrisaning turmush o‘rtog‘i — fransuz futbol jamoasi o‘yinchisi Yusuf Yaziji o‘zining Instagram sahifasida e’lon qildi.
Surat ostida Yaziji “Tug‘ilgan kunim uchun eng yaxshi sovg‘a” deya izoh qoldirdi.
O‘zbek tomoshabinlariga “Sevgi iztirobi” serialidagi Asu obrazi bilan yaxshi tanish aktrisa 2024-yilning may oyida turmushga chiqdi. Oradan to‘rt oy o‘tib juftlik farzand kutayotgani ma’lum bo‘ldi.
Paparatsilar uning so‘nggi kunlarda to‘lishgan holatdagi suratlarini olishga muvaffaq bo‘lgach, aktrisa xushxabar bilan shaxsan bo‘lishishga qaror qilgandi.
-Ki2LqwBC.jpg)
Ma’lumot uchun, Melisa Asli Pamuk 1991-yil 14-aprelda Niderlandiyaning Xarlem shahrida tug‘ilgan. Uning oilasi asli Turkiyaning Iskenderun shahridan. Melisa 2011-yilda “Turkiya go‘zali” tanlovida g‘olib bo‘lgan. Shundan so‘ng modelga turli rejissyorlardan takliflar kelib tushgan.
Uning debyut roli “Osmondagi sevgi” (“Yer Gök Aşk”) loyihasidan boshlangan. So‘ng “Sevgi iztirobi” (“Kara Sevda”) serialida Asu, “Kurt Seyt va Aleksandra” (“Kurt Seit ve Şura”)da Ayshe, “To‘qnashuv” (“Çarpışma”) serialida Jemre obrazlarini gavdalantirgan.
Melisa Asli Pamuk turmush o‘rtog‘idan olti yosh katta. Yusuf Yaziji 2024-yil sentyabr oyida Gretsiyaning “Olimpiakos” klubiga o‘tgan. Shuningdek, hozirda futbolchi Turkiya milliy terma jamoasida ham hujumchi sifatida faoliyat yuritmoqda.
Izoh (0)