O‘zbekistonda elektron logistika portalining mobil ilovasi ishga tushirildi

O‘zbekiston respublika tovar-xom ashyo birjasining e-logistika.uzex.uz elektron logistika portalining “E-logistics” mobil ilovasi test rejimida ishga tushirildi. Bu haqda birja matbuot xizmati xabar bermoqda. 

Mazkur ilova orqali foydalanuvchilar logistika portalida amalga oshiriladigan barcha elektron savdolarga tegishli bo‘lgan jarayonlarni boshqarish, shu jumladan buyurtmalarga narx takliflarini berish, zarur ma’lumot va shartnomalarni yuklab olishlari mumkin.

Mobil ilovada, shuningdek, yangi savdo ishtirokchilari uchun elektron raqamli imzo orqali onlayn tarzda ro‘yxatdan o‘tish imkoniyati ham yaratilgan.

Bundan tashqari, yuk tashuvchilar ilovada yonilg‘i quyish shaxobchalari va boshqa zarur xizmat ko‘rsatish obyektlarining manzillarini aks ettiruvchi interaktiv xaritadan foydalanishlari ham mumkin.

Tizimda ro‘yxatdan o‘tmagan foydalanuvchilar mobil ilovadan foydalangan holda portalga joylashtirilgan buyurtmalar shartlari bilan to‘liq tanishish, xaritada tegishli yo‘nalishlarni ko‘rish (Yandex xarita orqali) va amalga oshgan bitimlar xaqida ma’lumotlarni olish hamda mijozlarni qo‘llab-quvvatlash markazi bilan bog‘lanish imkoniyatiga ega.

Shu bilan birga, qisqa muddatlarda yuk ortirilgan transport vositalarning harakatlanishini mobil ilova orqali onlayn tarzda kuzatish xizmatining ishga tushirilishi ham kutilmoqda.

“E-logistics” mobil ilovasini  Google Play’da yuklab olish mumkin.