O‘zbekistonning chet davlatlardagi diplomatik va boshqa vakolatxonalar huzurida 55 ta referendum uchastkasi tuziladi. Bu haqda “Dunyo” agentligi xabar berdi.
Qayd etilishicha, Markaziy saylov komissiyasining 27-mart kuni bo‘lib o‘tgan navbatdagi majlisida Konstitutsiyaga o‘zgartish va qo‘shimchalar kiritish to‘g‘risidagi qonun loyihasi bo‘yicha 30-aprelda bo‘lib o‘tadigan referendumda xorijiy mamlakatlardagi vatandoshlarning konstitutsiyaviy huquqlarini amalga oshirishlarini taʼminlash masalasi ko‘rib chiqilgan.
Referendum bo‘yicha saylov uchastkalari ishini elchixona xodimlari, konsullar, elchixona maslahatchilari, vatandoshlar taʼminlaydi. Agentlik referendum o‘tkaziladigan joylar manzillarining elektron xaritasini ishlab chiqqan.
Eng yaqin referendum saylov uchastkalari haqida maʼlumotni ushbu havola orqali olish mumkin.
O‘zbekistonning o‘zida Qoraqalpog‘iston, viloyatlar va Toshkent shahri hududlarida 14 ta referendum okrugi tashkil etilmoqda. Xorijdagi uchastkalar Toshkent shahar okrugiga biriktirilgan. Referendumni o‘tkazish bo‘yicha 14 ta okrug komissiyasida umumiy hisobda 266 kishi ishlaydi.
Ta’kidlanishicha, 2021-yil 24-oktabr kuni bo‘lib o‘tgan prezidentlik saylovlarida “Dunyo” agentligi tomonidan ishlab chiqilgan uchastka saylov komissiyalari manzillarining elektron xaritasidan 71 mingdan ortiq kishi foydalangan.
Oliy Majlis Senati 14-mart kuni bo‘lib o‘tgan majlisda yangi tahrirdagi Konstitutsiya to‘g‘risidagi qonun loyihasi bo‘yicha referendum o‘tkazish to‘g‘risidagi qarorni maʼqullagandi. Qonun loyihasi “Xalq so‘zi” va “Narodnoye slovo” gazetalarining 15-mart kungi sonida eʼlon qilindi. Qonun loyihasi 6 bo‘lim, 155-moddadan iborat.
Izoh (0)