Yandex Maps navigatsiya ilovasi o‘zbek tilida gapira boshladi. Endilikda O‘zbekiston foydalanuvchilari uchun o‘zbek tilida nafaqat ilova interfeysi, tashkilot va geografik obyekt nomlari, balki avtomobilda yo‘nalish bo‘ylab yurishda yordam beruvchi ovozli ko‘rsatmalar imkoniyati ham mavjud. O‘zbekistonda Yandex Maps ilovasidan har oy 2,8 milliondan ortiq kishi foydalanadi. So‘nggi yilda auditoriya qariyb 50% ga o‘sdi.
iOS va Android’da Yandex Maps ilovasi allaqachon yangilandi. O‘zbek tilidagi ovozli ko‘rsatmalar mamlakat aholisi uchun xizmatni yanada qulayroq qiladi. Shuningdek, u O‘zbekiston haydovchilariga yo’ldan ko’z uzmay, manzilga oson yetib olishda yordam beradi. O‘zbek tilidagi ovozli ko‘rsatmalar Yandex Navi ilovasida ham paydo bo‘ldi.
“Bizning maqsadimiz – O‘zbekiston aholisi uchun maksimal qulay bo‘lgan navigatsiya ilovasini taqdim etish. Bizdagi maʼlumotlarga ko‘ra, shahar bo‘ylab yanada qulayroq harakatlanishga yordam beradigan ovozli ko‘rsatmalar foydalanuvchilarning 87% ida yoqilgan. Endilikda, bu nafaqat rus tilida, balki o‘zbek tilida ham mavjudligi tufayli biz maqsadimizga yanada yaqinroq keldik” – deya taʼkidladi Yandex Uzbekistan rahbari, Izzat Shukurov.
Tilni o‘zgartirish uchun ilovani oxirgi versiyasiga yangilash lozim. Keyin profilda sozlamalarga kirib “Xarita va interfeys” – “Til” – “O’zbekcha”ni tanlang. Shuningdek, ovozli ko‘rsatmalar tilini ham o‘zgartirish uchun sozlamalarda “Tovushlar va ogohlantirishlar” –“Annotatsiya tili” – “O‘zbekcha” ni tanlash lozim.
Yandex Maps ilovasini Google Play Market yoki AppStore orqali yuklab olish mumkin.
____
Yandex Uzbekistan yangi texnologiyalarni ishlab chiqarib, joriy etmoqda, bu esa O‘zbekistondagi insonlar hayotini va raqamli muhitni yaxshilashga xizmat qiladi.
Kompaniya 2018 yildan buyon mamlakatda faoliyat yuritib kelmoqda va aholiga onlayn taksi buyurtma qilish, oziq-ovqat yetkazib berish, bulutli xizmatlar, geoxizmatlar, ko‘ngilochar va ta’limga oid loyihalar kabi servislarni taklif etadi.
Yandex Maps bu – marshrutlarni piyoda yoki istalgan transport vositasi, masalan, avtomobil yoki avtobus uchun shakllantirishga yorda beradigan shahar ilovasidir. Bundan tashqari, ushbu ilova kerakli joylarni qidirish va boshqa kundalik vazifalarni hal qilishi mumkin.
Izoh (0)