Belarusning amaldagi rahbari Aleksandr Lukashenko yettinchi prezidentlik muddatiga qayta saylandi. Unga saylovchilarning 86,82 foizi ovoz berdi. Markaziy saylov komissiyasi dastlabki ma’lumotlarni e’lon qildi.
Saylovchilarning 3,6 foizi barcha nomzodlarga qarshi ovoz bergan. Saylovdagi davomad 85,7 foizni tashkil etgan. Liberal-demokratik partiya yetakchisi Oleg Gaydukevich 2,02 foiz ovoz olgan. Tadbirkor Anna Kanopatskaya 1,86 foizni qo‘lga kiritgan. Kommunistik partiya Markaziy qo‘mitasining birinchi kotibi Sergey Sirankov 3,21 foiz, Mehnat va adolat partiyasi raisi Aleksandr Xijnyak esa 1,74 foiz ovoz to‘plagan.
Belarusda prezidentlik saylovi 26-yanvar kuni bo‘lib o‘tdi. Ovoz berishdan keyin bo‘lib o‘tgan matbuot anjumanida Lukashenko hokimiyatni topshirish uchun o‘ziga voris qidirmayotganini aytdi. U respublikaning kelajakdagi rahbariyati allaqachon mavjud kadrlar zaxirasidan shakllantirilganini ta’kidladi.
Belarusdagi saylovlar g‘arblik kuzatuvchilar ishtirokisiz, shuningdek, xorijda saylov uchastkalari ochilmagan holda bo‘lib o‘tdi. Yevropa ittifoqi Belarusda bo‘lib o‘tgan prezidentlik saylovlarini erkin va demokratik deb hisoblamasliklarini, shuning uchun Minskka qarshi sanksiyalar joriy etishni davom ettirish niyatini bildirdi.
Izoh (0)