Hindiston shimolidagi Uttar-Pradesh shtatidagi shifoxonaning neonatal bo‘limida yuz bergan yong‘in oqibatida kamida 10 nafar yangi tug‘ilgan chaqaloq halok bo‘ldi. Bu haqda mahalliy hukumat xabar berdi.
Ularning so‘zlariga ko‘ra, bir kun avval tunda Jansi shahridagi Maharani Lakshmi Bay tibbiyot kollejining neonatal reanimatsiya bo‘limida yong‘in sodir bo‘lgan.
“Yettita jasadning shaxsi aniqlandi. Uchtasining shaxsi hali aniqlanmagan”, dedi shtat bosh vazir o‘rinbosari Brajesh Pathak jurnalistlarga.
Hindistonning Times Now nashriga ko‘ra, yana 16 nafar chaqaloqning ahvoli o‘ta og‘ir darajada. NDTV telekanali maʼlumotlariga ko‘ra, yong‘in boshlanganda neonatal reanimatsiya bo‘limida 54 nafar chaqaloq bo‘lgan.
AFP’ning qayd etishicha, yong‘inlar Hindistonda yomon qurilish amaliyoti, odamlarning haddan tashqari ko‘pligi va xavfsizlik qoidalarining yomonligi tufayli tez-tez uchrab turadi.
Yong‘inga qisqa tutashuv sabab bo‘lgan bo‘lishi mumkin
Mahalliy ma’muriyat rasmiysi Avinash Kumarning aytishicha, yong‘inning taxmin qilingan sabablaridan biri qisqa tutashuvdir.
“Biz yong‘in sabablarini o‘rganish uchun qo‘mita tuzdik”, dedi rasmiylar.
Hindiston bosh vaziri Narendra Modi voqeani “yurakni ezuvchi” fojia deb atadi.
“Begunoh farzandlarini yo‘qotganlarga chuqur hamdardlik bildiraman. Xudodan ularga bu katta yo‘qotishni ko‘tarishga kuch-quvvat berishini so‘rayman”, deb yozdi u X’dagi sahifasida.
Uttar-Pradesh bosh vaziri Yogi Adityanath qurbonlarning oilalariga 500 000 rupiy (5 595 yevro) tovon puli to‘lashini ma’lum qildi.
Izoh (0)