Vashington va Nyu-Dehli qiymati 3 milliard dollarga teng vertolyot va harbiy texnika savdosi borasida kelishuvga erishdi. Bu haqda AQSh prezidenti Donald Tramp ma’lum qilgan. Uning so‘zlariga ko‘ra, shartnomalar 25-fevralda imzolanadi. Bu haqda “Kommersant” xabar qildi.

Donald Tramp 24-fevral kuni Hindiston bosh vaziri Narendra Modi bilan Ahmadoboddagi “Motera” stadionida o‘tgan katta tadbirda nutq so‘zlagan. AQSh prezidenti Hindistonga ikki kun davom etadigan rasmiy tashrif bilan kelgan.

“Ikki tomonlama hamkorlikni yanada rivojlantirishni maqsad qilganmiz. AQSh Hindistonga dunyodagi eng yaxshi va ilg‘or harbiy texnikalarni yetkazib berishni rejalashtirmoqda. Biz eng kuchli qurol-yarog‘ni ishlab chiqaramiz. Eng yaxshisini tayyorlab, Hindiston bilan hamkorlik qilamiz”,— degan Tramp.

Avval AQSh prezidenti tashrifi oldidan Hindiston hukumati xavfsizlik qo‘mitasi 2,6 milliard dollar evaziga 24 ta Sikorsky MH-60R vertolyotlari sotib olinishini e’lon qilgandi. Shuningdek, tashrif doirasida umumiy qiymati 930 million dollarga teng oltita AH-64E Apache vertolyotlari xaridi ham kelishib olinadi.

Eslatib o‘tamiz, Xalqaro strategik tadqiqotlar instituti (IISS) 2019-yilda qurollanishga eng ko‘p mablag‘ sarflagan davlatlar reytingini e’lon qilgan, unda AQSh yetakchilik qilgandi (684,6 milliard dollar sarflangan). Ikkinchi o‘rinni — Xitoy (181,1 milliard), uchinchi o‘rinni — Saudiya Arabistoni (78,4 milliard), to‘rtinchi o‘rinni esa — Rossiya (61,6 milliard) egallagan, kuchli beshlikni Hindiston (60,5 milliard) yakunlab bergan.