Germaniyada Yevropa davlatlari yetakchilari va Amerika Qo‘shma Shtatlari prezidenti Donald Tramp onlayn muloqot o‘tkazadi. Muloqotda ishtirok etish uchun Ukraina prezidenti Vladimir Zelenskiy ham Germaniyaga bordi. Bu haqda Reuters agentligi xabar berdi.
Zelenskiy Germaniya kansleri Fridrix Merts bilan uchrashgan. Shundan so‘ng ikki tomonlama muzokaralar boshlangan.
Ta’kidlanishicha, Zelenskiy va Merts Finlyandiya, Fransiya, Britaniya, Italiya, Polsha va Yevropa Ittifoqi yetakchilari bilan videokonferensiyada ishtirok etadi. NATO bosh kotibi Mark Ryutte ham yig‘ilishga qo‘shilishi kutilmoqda. Keyinroq Tramp va vitse-prezident J.D. Vens muloqotga ulanadi.
“Tez orada Yevropa yetakchilari bilan gaplashaman. Ular kelishuv bo‘lishini istaydigan ajoyib insonlar”, deb yozgan Tramp ijtimoiy tarmoqda.
Manbaga ko‘ra, Yevropa yetakchilari Tramp va Putin ishtirokida o‘tkazilishi rejalashtirilgan uchrashuvda Ukraina manfaatlariga zid qarorlar chiqarilishi mumkinligidan xavotirda. Ular Ukrainaning manfaatlari va talablarini Trampga yetkazishga urinadi.
Qayd etilishicha, Amerika prezidenti Putin bilan Alyaskadagi uchrashuvining maqsadi tinchlik masalasida o‘zaro fikr almashish bo‘ladi. Bundan oldin Tramp tinchlik bo‘yicha har qanday kelishuv ba’zi hududlarni o‘zaro almashish evaziga bo‘lishi mumkinligini aytgan. Shu sababli Yevropa yetakchilari Putin va Trampning uchrashuvidan tashvishlanmoqda.
Alyaskadagi sammit natijalarini oldindan bashorat qilib bo‘lmasligi Yevropada xavotir uyg‘otmoqda. Ular AQSH va Rossiya o‘zaro keng qamrovli qarorlar qabul qilib, Ukrainani noqulay kelishuvga majburlashidan qo‘rqadi.
“Biz hozir buning oldini olishga e’tibor qaratayapmiz. AQSH hamkorlari bilan birgalikda ishlayapmiz. Yevropa tomonining muvofiqligi hamda birligini saqlayapmiz”, degan sharqiy yevropalik yuqori lavozimli amaldorlardan biri.
Trampni ranjitmaslik uchun Yevropa yetakchilari uning sa’y-harakatlarini olqishlamoqda. Biroq ular Ukraina hududining qariyb beshdan bir qismini Rossiya bosib olganini ta’kidlab, Ukraina ishtirokisiz hech qanday kelishuv bo‘lmasligini qayta-qayta takrorlashmoqda.
12-avgust kuni Tramp Yevropaning xavotirlariga javoban, Putin bilan uchrashuvda faqatgina tinchlikka erish uchun qanday shartlar kerakligini tinglash niyatida ekanini bildirdi.
Gallup instituti o‘tkazgan tadqiqotlarga ko‘ra, ukrainaliklarning 69 foizi urushning tezroq yakunlanishini istaydi. Biroq Rossiya foydasiga jiddiy yon berishlar evaziga emas.
Izoh (0)