Slovakiyalik psixologlar va psixiatrlar respublika bosh vaziri Robert Fitsoga ochiq xat yo‘llab, uning xulq-atvori va ommaviy nutqlar uslubini tanqid qildilar hamda o‘zini tahlil qilishga va siyosatdan chiqib ketish imkoniyatini ko‘rib chiqishga da’vat etdi.
“Biz sizning o‘zingizni tahlil qilish qobiliyatingizga, siyosiy xatti-harakatingizni tuzatish imkoniyatingizga, shu jumladan professional siyosatdan ketishni o‘ylab ko‘rishingizga umid qilamiz”, deb yozilgan psixologiya va psixiatriya sohasidagi 100 dan ortiq slovakiyalik mutaxassislar imzolagan maktub matnida.
Maktub mualliflari Fitsoning faktlarni buzib ko‘rsatayotganini, shuningdek, uning siyosatiga qarshi chiqqan siyosiy raqiblari, jurnalistlar va oddiy fuqarolarga hujum qilayotganini ta’kidlagan.
“Sizning siyosiy xatti-harakatingiz va e’lon qilayotgan qarashlaringiz jamiyatni bo‘lib tashlamoqda hamda uning ruhiy holatiga salbiy ta’sir ko‘rsatmoqda. Bu Slovakiya aholisining katta qismida umidsizlik va norozilik tuyg‘ularini keltirib chiqarmoqda”, deyiladi maktubda.
Mualliflarning fikricha, ko‘plab odamlar Slovakiyani tark etmoqda, chunki ular davlat siyosatining asosiy xususiyatlari mensimaslik, masxara qilish va tajovuzkorlik bo‘lgan mamlakatda yashashni istamaydilar. Ochiq xat matnida, shuningdek, mualliflarning Fitsoning tashqi siyosiy tashabbuslaridan noroziligi ham qayd etilgan. Ularning ta’kidlashicha, bu tashabbuslar Yevropa Ittifoqi va NATO siyosatiga zid keladi.
Slovakiya bosh vaziri, o‘z navbatida, ochiq xat tashabbuskorlari o‘z kasblarini siyosiy maqsadlarda suiiste’mol qilayotganini aytib, demokratik saylovlar natijasida hukumatni boshqarganini eslatdi.
Izoh (0)