Slovakiya bosh vaziri Robert Fitsoning ahvoli og‘ir, ammo barqaror, deya xabar berdi Banska Bistrika kasalxonasi shifokorlari.
“Bemorning ahvoli og‘ir, ammo barqaror”, — deyiladi shifoxona xabarida. Ta’kidlanishicha, bugungi maslahatlashuvda bosh vazir uchun tanlangan davolash rejasi tasdiqlangan.
Fitso o‘q jarohatlari bilan yotqizilgan shifoxona 21-may seshanba kuni uning ahvoli yaxshilanayotgani va bosh vazir hushida ekanligi haqida xabar bergandi.
Avvalroq Slovakiya prezidenti Peter Pellegrini kasalxonaga tashrif buyurib, bosh vazir bilan qisqacha suhbatlashgani ma’lum qilingandi.
15-may kuni Slovakiya Vazirlar mahkamasi yig‘ilishidan so‘ng bosh vazir Robert Fitso tashqarida yig‘ilganlar oldiga chiqqanida, unga o‘q uzilgandi.
Mazkur jinoyatni muxolifatdagi “Progressiv Slovakiya” partiyasi tarafdori, 71 yoshli yozuvchi Yuray Sintula sodir etgani aniqlangan va u qo‘lga olingan. U 25 yildan umrbodgacha qamoq jazosiga hukm qilinishi mumkin.
Izoh (0)