Slovakiya bosh vaziri Robert Fitso lavozimida qolar ekan, mamlakat Ukrainaning NATOga a’zo bo‘lishiga rozilik bermasligini ma’lum qildi.
“Men partiya raisi sifatida siyosiy nazoratimdagi deputatlarga Ukrainaning NATOga qo‘shilishiga hech qachon rozi bo‘lmasligini buyuraman”, dedi u.
Slovakiya bosh vaziri Ukrainaning Yevropa ittifoqiga qo‘shilishiga qarshi emasligini, biroq uning Shimoliy Atlantika alyansiga qo‘shilishi “uchinchi jahon urushi uchun asos bo‘lib xizmat qilishini” aytgan. Fitsoning so‘zlariga ko‘ra, Ukrainadagi urush “ruslarni tiz cho‘ktirish” maqsadida “G‘arb tomonidan qo‘llab-quvvatlangani” uchungina davom etmoqda.
Fitso, shuningdek, 2025-yilda Ikkinchi jahon urushi tugaganining 80 yilligi munosabati bilan Moskvaga tashrif buyurishni rejalashtirayotganini ma’lum qilgan.
“Iltimos, rusparastlikdan aziyat chekmaylik. Qizil armiya yoki sobiq Sovet ittifoqi haqida ijobiy gapirganimizda, bizni avtomatik ravishda Putinning agenti deb atamang”, dedi Slovakiya bosh vaziri.
Avvalroq Fitso Rossiya bilan urushdan keyin munosabatlarni tiklash tarafdori ekanini aytgan. Siyosatchiga ko‘ra, agar Ukrainadagi urush hozirgi Slovakiya hukumati vakolati davrida, ya’ni 2027-yilgacha yakunlansa, u Yevropa ittifoqi va Rossiya o‘rtasidagi “iqtisodiy va normal” munosabatlarni tiklash uchun harakat qilishini ma’lum qilgan.
Slovakiya bosh vazirining so‘zlariga ko‘ra, Bratislava Ukraina bilan ham do‘stona munosabatlardan juda manfaatdor.
Financial Times nashri ko‘plab G‘arb va Ukraina rasmiylari go‘yoki urushni tugatish uchun “Rossiya tomonidan bosib olingan hududlar NATOga a’zo bo‘lish evaziga” sxemasini ko‘rib chiqayotgani haqida xabar bergan.
“Bu yerlar kelajakda diplomatik yo‘llar bilan qaytarilishi kerakligi to‘g‘risida yashirin kelishuv mavjud”, deya ta’kidlagan nashr.
Izoh (0)