Словакиялик психологлар ва психиатрлар республика бош вазири Роберт Фицога очиқ хат йўллаб, унинг хулқ-атвори ва оммавий нутқлар услубини танқид қилдилар ҳамда ўзини таҳлил қилишга ва сиёсатдан чиқиб кетиш имкониятини кўриб чиқишга даъват этди.
“Биз сизнинг ўзингизни таҳлил қилиш қобилиятингизга, сиёсий хатти-ҳаракатингизни тузатиш имкониятингизга, шу жумладан профессионал сиёсатдан кетишни ўйлаб кўришингизга умид қиламиз”, деб ёзилган психология ва психиатрия соҳасидаги 100 дан ортиқ словакиялик мутахассислар имзолаган мактуб матнида.
Мактуб муаллифлари Фицонинг фактларни бузиб кўрсатаётганини, шунингдек, унинг сиёсатига қарши чиққан сиёсий рақиблари, журналистлар ва оддий фуқароларга ҳужум қилаётганини таъкидлаган.
“Сизнинг сиёсий хатти-ҳаракатингиз ва эълон қилаётган қарашларингиз жамиятни бўлиб ташламоқда ҳамда унинг руҳий ҳолатига салбий таъсир кўрсатмоқда. Бу Словакия аҳолисининг катта қисмида умидсизлик ва норозилик туйғуларини келтириб чиқармоқда”, дейилади мактубда.
Муаллифларнинг фикрича, кўплаб одамлар Словакияни тарк этмоқда, чунки улар давлат сиёсатининг асосий хусусиятлари менсимаслик, масхара қилиш ва тажовузкорлик бўлган мамлакатда яшашни истамайдилар. Очиқ хат матнида, шунингдек, муаллифларнинг Фицонинг ташқи сиёсий ташаббусларидан норозилиги ҳам қайд этилган. Уларнинг таъкидлашича, бу ташаббуслар Европа Иттифоқи ва НАТО сиёсатига зид келади.
Словакия бош вазири, ўз навбатида, очиқ хат ташаббускорлари ўз касбларини сиёсий мақсадларда суиистеъмол қилаётганини айтиб, демократик сайловлар натижасида ҳукуматни бошқарганини эслатди.
Изоҳ (0)