“Mavsum xitlari” taqdimot marosimi yil yili o‘tkazilib, eng yaxshi ijodkorlarni taqdirlaydi. Bu yilgi marosimda ham ko‘plab taniqli san’atkorlar bilan birga yosh ijrochilar ham taqdirlandi. “Daryo” muxbirlari taqdirlash marosimida ishtirok etib, foto va videoreportaj tayyorlashdi.
Tashkilotchilarning ta’kidlashicha, taqdimotdan avval nomzodlar ro‘yxati e’lon qilingan va eng ko‘p ovoz to‘plagan ishtirokchilar g‘oliblikni qo‘lga kiritgan.
Taqdimot marosimining ilk g‘olibi Yorqinxo‘ja Umarov bo‘ldi. U boshqa xonandalardan farqli ravishda jonli ijroda qo‘shiq kuyladi.
— Bu yil taqdirlanmaganimda ham xafa bo‘lmasdim. Chunki qo‘shig‘im xit bo‘ldi. Shuning o‘zi ham katta yutuq, — deydi xonanda Yorqinxo‘ja Umarov.
Bu yil sermahsul ijod qilgan Dostonbek Ergashev ham “Ko‘zmunchog‘im” qo‘shig‘i uchun taqdirlandi.
Jasurbek Mavlonov va Gulinur esa “Jaylan” qo‘shig‘i va klipi uchun taqdirlandi.
— Duet kuylashimizni ma’murlarimiz taklif qilishgan. Qo‘shiqning muvaffaqiyati faqatgina xonandaga bog‘liq emas. Klipni yaratgan Sunnat Namozovning ham hissasi katta. — deydi xonanda Jasurbek Mavlonov.
Xonanda Munisa Rizayeva bu yil beshinchi marotaba “Mavsum xitlari” taqdimot marosimida taqdirlandi. “Yetmadimi” qo‘shig‘i unga navbatdagi g‘alabani olib keldi.
— Bu yil u qadar jo‘shqin ijod qilolmadim. Chunki sog‘lig‘im biroz pand berdi. Hozir ham sahnaga isitmalagan ahvolda chiqdim, — deydi xonanda Munisa Rizayeva.
Yosh xonanda Jambul Muhammedov “Kabutar” qo‘shig‘i uchun “Mavsum xitlari”da g‘alabani qo‘lga kiritdi. Mukofotni unga aktyor Aziz Rametov topshirdi.
Xonanda Bahrom Nazarov esa “Uzr, go‘zal” qo‘shig‘i va klipi uchun taqdirlandi.
— Qo‘shiqni yoz oyida muxlislarga taqdim etgandim. Albatta, qo‘shiq xit bo‘lishini istaganmiz, ammo mukofotlanishi xayolimga kelmagandi, — deydi xonanda Bahrom Nazarov.
O‘zbekistonda xizmat ko‘rsatgan artist Ulug‘bek Rahmatullayev esa “Sevmaganimda” qo‘shig‘i uchun g‘oliblikni qo‘lga kiritdi.
— Bugun juda ko‘p yoshlar taqdirlandi. To‘g‘risi, o‘zimdan ko‘ra ularning g‘alabasiga quvonyapman, — deydi xonanda.
Xonanda Shohruxxon esa bu yilgi taqdimotda “Ey, yor” qo‘shig‘i uchun taqdirlandi. Unga mukofotni so‘z ustasi Mirzabek Xolmedov topshirdi.
— Albatta, taqdirlanganimdan xursandman. “Mavsum xitlari”ga omad tilayman. Loyiha bardavom bo‘lsin va unda ishtirok etish hamisha nasib qilsin, — deydi xonanda Shohruxxon.
O‘zbekistonda xizmat ko‘rsatgan artist Alisher Fayz ham “Mavsum xitlari”da taqdirlandi.
Xonanda Rayhon esa “Aldandim” taronasi uchun taqdirlandi. Unga mukofotni klipmeyker Nuriymon Sultonxo‘jayev topshirdi.
Sahna ortida O‘zbekistonda xizmat ko‘rsatgan artist Shohida Uzoqova miriqib raqs tushdi. Samimiy aktrisa yosh ijodkorlarni ham raqsga chorladi.
Xonanda Ozoda Nursaidova va bloger Ozod Xurramovning qo‘shig‘i g‘olib chiqishini ko‘pchilik kutmagandi. Ammo “Million” taronasini ham “Maqsum xitlari”da g‘alaba qozondi.
— Shukrki, bunday yutuqlarni ko‘p qo‘lga kiritganman. Ammo Ozod birinchi bor taqdirlanyapti. Shu bois bu mukofotni unga taqdim etaman. Ishonamanki, yanada zo‘r ijod qiladi, — deydi xonanda Ozoda Nursaidova.
2022-yilning eng sermahsul ijod qilgan xonandalaridan biri shubhasiz Hamdam Sobirov bo‘ldi.
Taqdirlash marosimiga ko‘plab san’at, sport va madaniyat sohasi vakillari tashrif buyurishdi.
Sahna ortida ijodkorlar bir-birlarini qutlashdi, xususan, Mirzabek Xolmedov yosh ijodkorlarni birma-bir g‘alaba bilan tabriklab chiqdi.
— Taqdirlanishni bir necha yildan buyon orzu qilaman. Bu yil qo‘shiqlarim munosib taqdirlanganidan juda xursandman, — deydi xonanda Hamdam Sobirov.
Ozod Xurramov “Million” qo‘shig‘i uchun duetdoshi Ozoda Nursaidovaga va ularni qo‘llab-quvvatlagan muxlislarga minnatdorlik bildirib o‘tdi.
Mavzuga doir:
- Madaniyat vazirining Sherali Jo‘rayev bilan dueti va Murod Xonto‘rayev oilasiga mukofot. 20 yillik “zapret”dan so‘ng o‘tkazilgan “Zamin yulduzlari” taqdirlash marosimidan reportaj (foto, video)
- Sahna ortidagi janjal, Sitoraning kelinsalomi, “Mario” va “I operatsiyasi”. “Dizayn shou”ning yangi konsert dasturidan reportaj (video)
Izoh (0)