Qirg‘iziston prezidenti Sadir Japarov Odilbek Qosimaliyevni Vazirlar Mahkamasi raisi hamda Prezident administratsiyasi rahbari etib tayinlash to‘g‘risidagi farmonni imzoladi, deya davlat rahbari matbuot xizmati ma’lum qildi.
24.kg xabar berishicha, Qosimaliyev nomzodi 18-dekabr kuni bo‘lib o‘tgan Jogorku Kenesh (parlament) yig‘ilishida tasdiqlandi. Qosimaliyev deputatlarga o‘zidan oldingi Oqilbek Japarov dasturini davom ettirishga so‘z berdi.
Ushbu tayinlovdan avval Qosimaliyev bosh vazirning birinchi o‘rinbosari lavozimida faoliyat yuritgan, 2015-yildan 2018-yilgacha esa mamlakat Moliya vazirligiga rahbarlik qilgan.
16-dekabr kuni Qirg‘iziston rahbari Oqilbek Japarovni “boshqa ishga o‘tishi munosabati bilan” vazifasidan ozod etdi. U bu lavozimda uch yildan ko‘proq vaqt ishlagan edi. Mahalliy ommaviy axborot vositalari uning prezident maslahatchisi bo‘lishi mumkinligini yozishgan.
18-dekabr kuni bo‘lib o‘tgan parlament yig‘ilishida prezident Qirg‘iziston Soliq xizmati rahbariyati va xodimlari ustidan qo‘zg‘atilgan jinoyat ishini ko‘rib chiqishda manfaatlar to‘qnashuviga yo‘l qo‘ymaslik uchun sobiq bosh vazirni lavozimidan ozod etishga qaror qilganini ma’lum qildi.
“Soliq tizimidagi salbiy holatlar bizni juda xafa qildi. Aksiz markalari bilan bog‘liq firibgarliklar fosh etildi. Bu soha Oqilbek Usenbekovich nazorati ostida edi, shunga ko‘ra u noqonuniy harakatlarni to‘xtatishi mumkin edi. Davlat soliq xizmati rahbariyatiga nisbatan olib borilayotgan tergov ishi yuzasidan manfaatlar to‘qnashuvini bartaraf etish maqsadida uni lavozimidan chetlatishga majbur bo‘ldim”, dedi Japarov.
U sobiq bosh vazir mamlakatning iqtisodiy yutuqlariga katta hissa qo‘shganini ta’kidlab, uning iste’fosini “siyosiylashtirmaslikni” so‘radi.
Izoh (0)