Qirg‘izistonda Milliy xavfsizlik qo‘mitasining bir necha xodimiga nisbatan tergov boshlandi. Bu haqda MXQ raisi Qamchibek Tashiyev ma’lum qildi.
Ma’lum qilinishicha, gap 6-boshqarmaga (MXQning alohida muhim ishlari bo‘yicha boshqarmasi) tegishli bir nechta xodim haqida ketmoqda.
Bir-ikki kunlik manfaat uchun emas, kelajak uchun ishlang. Davlat manfaati emas, shaxsiy manfaatingiz yo‘lida ish yuritayotgan bo‘lsangiz ham, baribir hammasi ochiqlanadi. Bu haqda ertami-kechmi, bugun bo‘lmasa, ertaga yoki indinga ma’lum bo‘ladi. Orangizda bundan olti oy yoki bir yil avval 6-boshqarmada ishlab jinoyat sodir etgan ikki-uch xodim bor.
Men tergov o‘tkazishni buyurdim, yaqin kunlarda hamma narsa ma’lum bo‘ladi. Hammasini ildizigacha kovlab chiqaman. Agar men topshirayotgan ishlar bo‘yicha pora olsangiz, albatta, javobgarlikka tortilasiz. Men buni behuda aytayotganim yo‘q. Davlat siz uchun barcha zarur sharoitlarni yaratib bermoqda. Bu sizning halol xizmat qilishingiz uchun qilinmoqda.
Tan olishim kerak, xodimlardan birortasi qamoqqa olinganda yuragim og‘riydi, lekin buni qilishga majburman. Aynan shu sababli rahbarman. Agar kimgadir achinib, rahm qilsam, bizda tartibsizlik boshlanib ketadi, dedi Tashiyev.
Xavfsizlik xizmati rahbari, shuningdek, bo‘ysunuvchilarni, agar yordam kerak bo‘lsa, davlat qo‘mitasi rahbariyatiga murojaat qilishga chaqirdi. Tashiyev uning eshiklari farroshlardan tortib o‘rinbosarlargacha ochiq ekanini aytdi.
Izoh (0)