Shavkat Mirziyoyev 6-dekabr kuni Qirg‘iziston prezidenti Sadir Japarovni tug‘ilgan kuni bilan tabrikladi. Bu haqda Prezident matbuot xizmati xabar berdi.
Sadir Japarov 1968-yilda tug‘ilgan bo‘lib, bu yil 56 yoshni qarshi oldi. Shavkat Mirziyoyev Qirg‘iziston yetakchisiga mustahkam sog‘lik, oilaviy baxt-saodat hamda mamlakatning barqaror ijtimoiy-iqtisodiy taraqqiyotini ta’minlashga qaratilgan keng ko‘lamli islohotlarni amalga oshirishda katta muvaffaqiyatlar, qardosh qirg‘iz xalqiga esa farovonlik va ravnaq tiladi.
Xabarda aytilishicha, suhbat davomida O‘zbekiston bilan Qirg‘iziston o‘rtasidagi do‘stlik, yaxshi qo‘shnichilik va keng qamrovli strategik sheriklik munosabatlarini yanada kengaytirish va mustahkamlash masalalari ham muhokama qilindi. Oliy darajada erishilgan kelishuvlarni amalga oshirishga alohida e’tibor qaratildi.
Davlat rahbarlari ikki tomonlama savdo-iqtisodiy va gumanitar hamkorlik rivojlanib borayotganini qayd etdi. Energetika va transport sohalarida yirik mintaqaviy infratuzilma loyihalarini jadallashtirish muhimligi aytildi.
O‘zbekiston va Qirg‘iziston prezidentlari, shuningdek, Markaziy Osiyoda mintaqaviy hamkorlik masalalari yuzasidan ham fikr almashdilar va bo‘lajak qo‘shma tadbirlar rejasini muhokama qildi.
Izoh (0)