Қирғизистон президенти Садир Жапаров Одилбек Қосималиевни Вазирлар Маҳкамаси раиси ҳамда Президент администрацияси раҳбари этиб тайинлаш тўғрисидаги фармонни имзолади, дея давлат раҳбари матбуот хизмати маълум қилди.
24.кг хабар беришича, Қосималиев номзоди 18 декабрь куни бўлиб ўтган Жогорку Кенеш (парламент) йиғилишида тасдиқланди. Қосималиев депутатларга ўзидан олдинги Оқилбек Жапаров дастурини давом эттиришга сўз берди.
Ушбу тайинловдан аввал Қосималиев бош вазирнинг биринчи ўринбосари лавозимида фаолият юритган, 2015 йилдан 2018 йилгача эса мамлакат Молия вазирлигига раҳбарлик қилган.
16 декабрь куни Қирғизистон раҳбари Оқилбек Жапаровни “бошқа ишга ўтиши муносабати билан” вазифасидан озод этди. У бу лавозимда уч йилдан кўпроқ вақт ишлаган эди. Маҳаллий оммавий ахборот воситалари унинг президент маслаҳатчиси бўлиши мумкинлигини ёзишган.
18 декабрь куни бўлиб ўтган парламент йиғилишида президент Қирғизистон Солиқ хизмати раҳбарияти ва ходимлари устидан қўзғатилган жиноят ишини кўриб чиқишда манфаатлар тўқнашувига йўл қўймаслик учун собиқ бош вазирни лавозимидан озод этишга қарор қилганини маълум қилди.
“Солиқ тизимидаги салбий ҳолатлар бизни жуда хафа қилди. Акциз маркалари билан боғлиқ фирибгарликлар фош этилди. Бу соҳа Оқилбек Усенбекович назорати остида эди, шунга кўра у ноқонуний ҳаракатларни тўхтатиши мумкин эди. Давлат солиқ хизмати раҳбариятига нисбатан олиб борилаётган тергов иши юзасидан манфаатлар тўқнашувини бартараф этиш мақсадида уни лавозимидан четлатишга мажбур бўлдим”, деди Жапаров.
У собиқ бош вазир мамлакатнинг иқтисодий ютуқларига катта ҳисса қўшганини таъкидлаб, унинг истеъфосини “сиёсийлаштирмасликни” сўради.
Изоҳ (0)